ޣައްޒާގެ އުތުރުގައި އޮންނަ ޖަބަލިއާ ރެފިއުޖީ ކޭމްޕް ސަރަހައްދަށް ސަހްޔޫނީންގެ އިތުރު ސިފައިން ފޮނުވައިފި ކަމަށް ރިޕޯޓްތަކުން ބުނެފިއެވެ.

ސަހްޔޫނީން އިއްޔެ ވަނީ އެ ސަރަހައްދަށް ވަރުގަދަ ހަމަލާތަކެއްދީ، ގިނަ ބަޔަކު ޝަހީދުކޮށްލައިފައެވެ.

މި ހަމަލާގައި ޝަހީދުކޮށްލި މީހުންގެ ހަށިތަކުން މަގުތައް ފުރިފައިވާ ކަމަށް ރިޕޯޓްތަކުން ބުނެއެވެ. އަދި މީގެ ތެރޭގައި އަންހެނުންނާއި ކުޑަކުދިންވެސް ހިމެނެއެވެ.

ސަހްޔޫނީން މިހާރު ދަނީ އެ ސަރަހައްދަށް އިތުރު ސިފައިން ފޮނުވަން ފަށައިފައެވެ. އެއީ ޖަބަލިއާ ސަރަހައްދުގައި ހަރަކާތްތެރިވާ ހަމާސްގެ މުޖާހިދުންނަށް އަމާޒުކޮށް ހަމަލާތައް ދިނުމަށް ކަމަށް ބައެއް ރިޕޯޓުތައް ބުނެއެވެ.

ޣައްޒާއަށް ސަހްޔޫނީން ހުއްޓުމެއްނެތި ހަމަލާތައް ދެމުން އަންނަތާ މިހާރު އަހަރަކަށް ވުރެ ގިނަ ދުވަސް ވެއްޖެއެވެ.