ޔޫކްރެއިންއާ ދެކޮޅަށް ރަޝިޔާއިން ކުރަމުންދާ ހަނގުރާމައިގައި އެހީތެރިވުމަށް އުތުރު ކޮރެއާއިން ހަމައެކަނި ހަތިޔާރުގެ އިތުރުން ސިފައިން ވެސް ފޮނުވަމުންދާ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ތުހުމަތު ކުރައްވައިފިއެވެ.
އާދީއްތަ ދުވަހުގެ ރޭ ދެއްވި ވީޑިއޯ ތަގުރީރުގައި ޒެލެންސްކީ ވިދާޅުވީ ރަޝިއާ އާއި އުތުރު ކޮރެއާ ފަދަ ސަރުކާރުތަކާ ދެމެދު ކޯލިޝަން އިތުރުވަމުންދާތަން ފެންނަ ކަމަށެވެ. "މިއީ މިހާރު ހަމައެކަނި ހަތިޔާރު ޓްރާންސްފާ ކުރުން ނޫން. ހަގީގަތުގައި އެއީ އުތުރު ކޮރެއާއިން މީހުން އަތުލާ އަސްކަރީ ފައުޖުތަކަށް ބަދަލުކުރުމެވެ." ޒެލެންސްކީ ވިދާޅުވިއެވެ.
އޭނާ ވިދާޅުވީ ރަޝިއާގެ އިއްތިހާދުތައް އިތުރަށް ބަދަހިވަމުންދާތީ ޔޫކްރެއިން އާއި އެ ގައުމުގެ ބައިވެރިންގެ ރައްދު ވަރުގަދަ ކުރަން ޖެހޭ ކަމަށާއި ބޮޑު ހަނގުރާމައެއް ހުއްޓުވުމަށް އަސްކަރީ އެހީތެރިކަން އިތުރުކުރުމަށް ގޮވާލައްވަމުން ގެންދަވާ ކަމަށެވެ.
މީގެ އިތުރުން، ފްރޮންޓް ލައިންއަށް އިތުރު އެއްބާރުލުން ބޭނުންވާ ކަމަށް އޭނާ ވިދާޅުވި އެވެ.
ރަޝިޔާގެ އެތެރޭގެ އަސްކަރީ އަމާޒުތަކަށް ހަމަލާދިނުމަށް ދިގު ރާސްތާގެ މިސައިލް ތައް ބޭނުންކުރުމުގެ ހުއްދަ ދިނުމަށާއި ހަނގުރާމައިގެ ގާބިލްކަން ކުޑަކުރުމަށް ޔޫކްރެއިންގެ އެކުވެރިންގެ ކިބައިން ޒެލެންސްކީ ހުށަހެޅުއްވި އެދުމަކީ މިހާތަނަށް ނާކާމިޔާބުވެފައިވާ ކަމެކެވެ.
