ސަހްޔޫނީންގެ އަސްކަރިއްޔާއިން ޣައްޒާގެ ޖަބަލިއާގައި ހުންނަ ސްކޫލަކަށް ބޮން އަޅައި ފަސް ކުޑަކުދިން ހިމެނޭހެން 15 މީހަކު ޝަހީދުކޮށްލައިފި އެވެ.
ޣައްޒާގެ ސިއްހަތާ ބެހޭ ވުޒާރާގެ އޮފިޝަލް މެދަތު އައްބާސް ރޮއިޓާސްއަށް ވިދާޅުވީ ޣައްޒާގެ އުތުރުގައި އޮންނަ ޖަބަލިއާގައި ހުންނަ އަބޫ ހުސައިން ސްކޫލަކީ ގެދޮރު ގެއްލިފައިވާ މީހުންނަށް ހިޔާވަހިކަން ފޯރުކޮށްދެމުން އައި ސްކޫލެއް ކަމަށެވެ.
އެ ހަމަލާގައި އެތައް ބަޔަކު ޒަހަމްވެފައިވާ ކަމަށާއި އަލިފާން ނިއްވަން ފެން ވެސް ނެތް ކަމަށް އޭނާ ވިދާޅުވި އެވެ.
އިޒްރޭލުގެ ދިފާއީ ބާރު (އައިޑީއެފް) އިން ބުނީ ހަމަލާ އަމާޒުކޮށްފައި ވަނީ އެ ސަރަހައްދަށް އެއްވި ހަމާސް ޖަމާއަތާއި އިސްލާމިކް ޖިހާދުގެ ގިނަ އަދަދެއްގެ ހަނގުރާމަވެރިންނަށް ކަމަށެވެ.
ހަމަލާދިން ސްކޫލުގައި ހަމާސް ޖަމާއަތާއި އިސްލާމިކް ޖިހާދުގެ ގިނަ އަދަދެއްގެ ހަނގުރާމަވެރިން ތިބި ކަމަށް ޔަހޫދީން ކުރާ ތުހުމަތު ހަމާސްއިން ވަނީ ދޮގުކޮށްފައި އެވެ.
