ޔޫކްރޭން އާއި ދެކޮޅަށް ރަޝިޔާއިން ކުރަމުންދާ ހަނގުރާމައަށް އެހީތެރިވުމަށް އުތުރު ކޮރެއާއިން ސިފައިން ފޮނުވާފައިވާ ކަމަށް ދެކުނު ކޮރެއާގެ ޖާސޫސީ އިދާރާއިން ބުނެފިއެވެ.

ނޭޝަނަލް އިންޓެލިޖެންސް ސާވިސް (އެންއައިއެސް) އިން ހުކުރު ދުވަހު ނެރުނު ބަޔާނެއްގައި ކަށަވަރުކޮށްދީފައިވާ ގޮތުގައި ރަޝިޔާގެ ކަނޑުގެ ސިފައިންގެ ބޯޓުތަކުން އުތުރު ކޮރެއާގެ 1،500 ސްޕެޝަލް އޮޕަރޭޝަންސް ފޯސް ރަޝިޔާގެ ބަނދަރު ސިޓީ ވްލަޑިވޮސްޓޮކަށް ފޮނުވާފައިވެއެވެ.

މިގޮތުން ވަރަށް އަވަހަށް އުތުރު ކޮރެއާގެ އިތުރު ސިފައިން ރަޝިޔާއަށް ފޮނުވާނެ ކަމަށް ބެލެވޭ ކަމަށް ބުނެފައިވެ އެވެ. މީގެ ސަބަބުން ތިން ވަނަ ގައުމެއް މި ހަމަނުޖެހުމުގެ ތެރެއަށް ދަމައިގަނެ، އުތުރު ކޮރެއާ އާއި ހުޅަނގާއި ދެމެދު އުފެދިފައިވާ ހަމަނުޖެހުން އިތުރަށް ބޮޑުވެދާނެކަމަށް ލަފާކޮށްފައިވެއެވެ.

އެންއައިއެސް އިން ރިޕޯޓްކޮށްފައިވާ ގޮތުގައި ރަޝިޔާއަށް ފޮނުވި އުތުރު ކޮރެއާ ސިފައިންނަށް ވަނީ ރަޝިޔާގެ އަސްކަރީ ޔުނީފޯމްތަކާއި ހަތިޔާރާއި ފޯޖް އައިޑެންޓިފިކޭޝަން ޑޮކިއުމަންޓްތައް ފޯރުކޮށްދީފަ އެވެ. މިހާރު ވްލަޑިވޮސްޓޮކްގެ އަސްކަރީ މަރުކަޒުތަކާއި އުސޫރިއިސްކް، ޚަބަރޮވްސްކް އަދި ބްލަގޮވެޝްޗެންސްކް ފަދަ އެހެން ތަންތަނުގައި ތިބި މި ތަމްރީނު ނިމުމުން ކޮމްބަޓް ޒޯންތަކަށް ފޮނުވާނެ ކަމަށް ބެލެވެ އެވެ.