ލުބުނާނުގެ ހަނގުރާމަވެރި ޖަމާއަތެއް ކަމަށްވާ ހިޒްބުالله އިން ވަނީ މީގެ މަހެއްހާ ދުވަސް ކުރިން ސަހްޔޫނީން އަވަހާރަކޮށްލި ޒަމާންވީ ވެރިޔާ ހަސަން ނަސްރުاللهގެ ބަދަލުގައި އެ ޖަމާއަތުގެ އާ ލީޑަރަކަށް ނާއިމް ޤާސިމް ކަމަށް އިއުލާނުކޮށްފައެވެ.

ހިޒްބުاللهގެ ނިންމުންތައް ނިންމުމުގެ މައި އިދާރާ، ޝޫރާ ކައުންސިލުން އެއްބަސްވީ 1991 ވަނަ އަހަރުން ފެށިގެން ޑެޕިއުޓީ ލީޑަރުގެ މަގާމުގައި ހުންނެވި ގާސިމް އާ ސެކްރެޓަރީ ޖެނެރަލްގެ މަގާމަށް ހަމަޖެއްސުމަށް ކަމަށް އެ ގްރޫޕުން މިއަދު ބުނެފައިވެ އެވެ.

އުމުރުފުޅުން 70 އަހަރުފުރިފައިވާ އަދި ކެމިސްޓްރީ ކިޔަވައިދެއްވަމުން ގެންދެވި ޤާސިމް އަކީ އާ ލީޑަރުކަމަށް ހޮވޭނެ ކަމަށް ގިނަ މީހުން ހީކުރި މީހާ ނޫނެވެ. ގިނަ ތަޖުރިބާކާރުން ހީކުރީ އައްޔަނު ކުރެވޭނީ ނަސްރުاللهގެ އާއިލާ ފަރާތެއް ކަމުގައިވާ ހާޝިމް ސަފީދީން ކަމަށެވެ. ނަމަވެސް އޮކްޓޫބަރު މަހުގެ ކުރީކޮޅު އިޒްރޭލުން ބެއިރޫތަށް ދިން ވައިގެ ހަމަލާއެއްގައި އޭނާ ވަނީ މަރުވެފަ އެވެ.

ލަންޑަންގެ ތިންކް ޓޭންކެއް ކަމަށްވާ ޗަތަމް ހައުސްގެ އެސޯސިއޭޓް ފެލޯ ލީނާ ޚަތީބު ވިދާޅުވި ގޮތުގައި ޤާސިމްގެ އިންތިޚާބަކީ ހިޒްބުالله އާއި އެޖަމާއަތަށް ތާއީދުކުރާ އީރާނަށް ވެސް ހެޔޮ ބަދަލެއް އަންނާނެ ކަމެކެވެ.

އޭނާއަކީ ހިޒްބުاللهގެ ބާކީ ތިއްބެވި ލީޑަރުންގެ ތެރެއިން ސިޔާސީ ގޮތުން އެންމެ ތަޖުރިބާކާރު އަދި އެންމެ އާންމުކޮށް ފާހަގަކޮށްލެވޭ ބޭފުޅެއް ކަމަށް ޚަތީބު ވިދާޅުވި އެވެ.

ހިޒްބުالله އާއި ހަމާސް އަކީ ވެސް އީރާނުގެ ތާއީދު އޮންނަ އަދި ޓެރަރިސްޓް ޖަމާއަތްތަކުގެ ގޮތުގައި އެމެރިކާ އާއި އެހެނިހެން ގިނަ ގައުމުތަކުން ކަނޑައަޅާފައިވާ ޖަމާއަތްތަކެކެވެ.