ސްޕެއިންގެ އިރުމަތީ ސަރަހައްދު ކަމަށްވާ ވެލެންސިއާއަށް ބޯކޮށް ވާރޭވެހި ފެންބޮޑުވެ 64 މީހުން މަރުވެފައިވާ ކަމަށް އެ ގައުމުގެ އޮފިޝަލުން ބުނެފި އެވެ.

އިއްޔެ ކުރިމަތިވި މި ވިއްސާރައިގައި ސްޕެއިންގެ ދެކުނުގެ ބައެއް ސަރަހައްދުތަކާއި އިރުމަތީ ސަރަހައްދުތަކުގައި ވަނީ ފެންބޮޑުވެފަ އެވެ. ސޯޝަލް މީޑިއާގައި އާންމުކޮށްފައިވާ ފުޓޭޖްތަކުން ފެންނަ ގޮތުގައި ވެހިކަލްތައް މަގުމައްޗަށް ފައިބައިގެން ދަނީ މަޑި ކުލައިގެ ފެންގަނޑަކުންނެވެ.

ސްޕެއިންގެ އިމަޖެންސީ ރެސްޕޮންސް ޔުނިޓްތަކުގެ 1،000 އަށް ވުރެ ގިނަ ސިފައިން ހާލުގައި ޖެހުނު ސަރަހައްދުތަކަށް ހަރަކާތްތެރިވެ، މަރުކަޒީ ސަރުކާރުން ކްރައިސިސް ކޮމެޓީއެއް އުފައްދައި، މީހުން ސަލާމަތް ކުރުމުގެ މަސައްކަތްތައް ކޯޑިނޭޓް ކުރުމަށް އެހީތެރިކަން ފޯރުކޮށްދެމުންދާ ކަމަށް އޮފިޝަލުން ބުނެފައިވެއެވެ.

ވެލެންސިއާގެ އިމަޖެންސީ ހިދުމަތްތަކުން ވަނީ އެއްވެސް ބާވަތެއްގެ މަގުމަތީ ދަތުރުތަކުން ދުރުހެލިވެ، ރަސްމީ ވަސީލަތްތަކުން ލިބޭ އިތުރު އަޕްޑޭޓްތަކާ އެއްގޮތަށް އަމަލުކުރުމަށް އިލްތިމާސްކޮށްފަ އެވެ.