ލުބުނާނުގެ ތާރީޚީ ސިޓީއެއް ކަމަށްވާ ބާލްބެކްއަށް ސަހްޔޫނީން ހަމަލާދޭން ފަށާފައި މިވަނީ މީގެ ކުރިން މީހުން ހުސްކުރުމުގެ އަމުރެއް ނެރުމަށްފަހުއެވެ. އައިޑީއެފްގެ ތަރުޖަމާނަކު އާންމުކޮށްފައިވާ މެޕެއްގައި ވާގޮތުން މީހުން ހުސްކުރުމަށް ފާހަގަކޮށްފައިވާ އެއް ސަރަހައްދަކީ ރޯމަނުގެ އާސާރީތަކެތި ހުރި ސަރަހައްދެކެވެ.

ސަހްޔޫނީން ދިން ވައިގެ މި ހަމަލާގައި ކުޑަކުދިންހިމެނޭ ގޮތަށް އެތައް ބަޔަކު މަރުވެފައިވާއިރު، މިއީ "ބިރުވެރި ހާދިސާއެއް" ކަމަށާއި، ފާއިތުވި ތިން މަސް ދުވަހުގެ ތެރޭގައި ސަހްޔޫނީޏް ދިން އެންމެ ނުރައްކާތެރި އެއް ހަމަލާ ކަމަށް އދއިން ވަނީ ބުނެފައެވެ.

ފަލަސްތީނަށް ފަހު ސަހްޔޫނީން އަންނަނީ ހުއްޓުމެއްނެތި ލުބްނާން އަށް ހަމަލާދީ އެ ގައުމު ސުންނާފަތި ކުރަމުންނެވެ.

މި ހަމަލާތަކުގައި ގިނަ ބަޔަކު ވަނީ ޝަހީދުވެ އެތައް ބަޔެއްގެ ގެދޮރު ވަނީ ގެއްލިފައެވެ.

މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ފަލަސްތީނާއި އަދި މުސްލިމް ގައުމުތަކާއި ދެކޮޅަށް ސަހްޔޫނީން ހިންގަމުން އަންނަ ލާއިންސާނީ އަމަލުތައް ކުށްވެރިކޮށް ހަނގުރާމަ ހުއްޓާލުމަށް ދުނިޔޭގެ އެކި ސަރަހައްދުތަކުގައި އަންނަނީ އިހުތިޖާޖުތައް ކުރަމުންނެވެ.