ޣައްޒާގައި ހުންނަ ނުސެއިރާތު ރެފިއުޖީ ކޭމްޕަށް ސަހްޔޫނީން ދިން ހަމަލާއެއްގައި ފަސް މަހުގެ ތުއްތު ކުއްޖަކު ޝަހީދުވެއްޖެއެވެ.
ސަހްޔޫނީން ރެއިން ފެށިގެން ދަނީ ދެއިރު އަލް ބަލާހް، ނުސެއިރަތު ރެފިއުޖީ ކޭމްޕު އަދި އައްޒަވައިދާ ސަރަހައްދަށް އާޓިލަރީއާއި ބޮމުން ހަމަލާ ދެމުންނެވެ. އެ ހަމަލާތައް ދިނުމަށް މަނަވަރުތައް ވެސް ބޭނުންކޮށްފައިވެއެވެ. ނުސެއިރާތުގައި އެކަނި 25 މީހުން ޝަހީދުކޮށްލާފައިވާއިރު އޭގެ ތެރޭގައި ފަސް މަހުގެ ކުއްޖަކު ވެސް ހިމެނެއެވެ.
ޣައްޒާގެ ގަތުލްއާމު ފެށުނު ފަހުން އުފަންވި އެ ކުއްޖާގެ މާމައާއި އާއިލާގެ އެހެން މީހުން ހަމަލާއިން ސަލާމަތްވި ކަމަށް ބުނެފައިވެއެވެ.
ނަމަވެސް، އޭނާ ބުނެފައިވާ ގޮތުގައި، އާންމުން ދިރިއުޅޭ ތިން އިމާރާތެއް ބިމާ ހަމަކޮށްލާފައިވާއިރު، އޭގެ ތެރެއިން އެއް އިމާރާތެއްގައި އުޅުނު އެއް އާއިލާއެއްގެ 10 މީހަކު ޝަހީދުވެފައިވާ ކަމަށެވެ.
ސަހްޔޫނީންގެ ހަމަލާތަކުގައި ރޭ އެކަނި 47 މީހަކު ޝަހީދުކޮށްލައިފައެވެ އަލްއަގްސާ މާޓިޔާސް ހޮސްޕިޓަލުން ބުނެފައިވާ ގޮތުގައި އެ ހަމަލާތަކުގައި ގިނައިން ޝަހީދުވެފައި ވަނީ އަންހެނުންނާއި ކުޑަކުދިންނެވެ.
ޣައްޒާގައި ޝަހީދުވި މީހުންގެ އަދަދު ވަނީ 43،000 އަށް އަރައިފައެވެ. އަދި ޒަހަމްވި މީހުންގެ އަދަދު ވަނީ 101،000 އަށް ވުރެ މައްޗަށް އަރައިފައެވެ.
