އިރުމަތީ އިންޑޮނޭޝިއާގައި އަލިފާން ފަރުބަދަ ގޮވައި، ވަށައިގެންވާ ރަށްތަކަށް އަސަރުކޮށް،އެތައް ގެއެއް އަނދާ ހުލިވެ، 10 މީހަކު މަރުވެއްޖެ ކަމަށް އެ ގައުމުން ރިޕޯޓްކޮށްފިއެވެ.

މަޝްހޫރު ފަތުރުވެރިންގެ ޖަޒީރާ ފްލޮރެސްގައި ހުންނަ 1،703 މީޓަރު (5،587 ފޫޓު) ގެ ޓްވިން އަލިފާން ފަރުބަދައެއް ކަމަށްވާ މައުންޓް ލެވޮޓޯބީ ލާކީ-ލާކީ ގޮވުމުގެ ހާދިސާ ހިނގާފައި ވަނީ ރޭ ދަންވަރު ވަގުތެއްގަ އެވެ.

އެގައުމުގެ ޑިޒާސްޓާ މިޓިގޭޝަން އެޖެންސީ ބީއެންޕީބީގެ ތަރުޖަމާނު އަބްދުލް މުހާރީ ބޭއްވި ނޫސްވެރިންގެ ބައްދަލުވުމެއްގައި މަރުވި މީހުންގެ އަދަދު ކަށަވަރުކޮށްދެއްވަމުން ވިދާޅުވީ ގޮވުންތަކުގެ ސަބަބުން 10،295 މީހުންނަށް އަސަރުކޮށްފައިވާ ކަމަށެވެ. އޭނާ ވިދާޅުވީ އެތަނުން ފިލައިގެން ދިޔަ މީހުންގެ އަދަދު އަދިވެސް ހިސާބު ކުރަމުން އަންނަ ކަމަށެވެ.

އެ އިދާރާއިން ބުނީ ކައިރީގައި އޮންނަ ހަ ރަށެއް ކަމަށްވާ ޕުލޫލެރާ، ނަވޮކޯޓޭ، ހޮކެންގް ޖަޔާ، ކްލަޓަންލޯ، ބޯރޫ އަދި ބޯރޫ ކެޑަންގްގެ ވުލަންގިޓަންގް އަށް މި ގޮވުމުގެ ސަބަބުން މަދުވެގެން 10،000 މީހުންނަށް އަސަރުކޮށްފައިވާ ކަމަށެވެ.