ލުބުނާނަށް ސަހްޔޫނީން ދިން ވައިގެ ހަމަލާއެއްގައި ތިން މީހަކު ޝަހީދުވެއްޖެއެވެ.

އަލްޖަޒީރާއިން އާންމުކޮށްފައިވާ ފޫޓޭޖުތަކުން ދައްކާ ގޮތުގައި ހަރެތު ސައިދާގެ މަލްޓި ސްޓޯރީ އިމާރާތަކަށް ދިން ހަމަލާގެ ފަހުން ކުރިމަތިވި ކަންތައްތައް ފެންނައިރު، މަތީ ބުރީގައި އަލިފާން ރޯވެ ހުރިހާ ފްލޯތަކަށް ގެއްލުންތަކެއް ލިބިފައިވެ އެވެ.

ނިއުސް އެޖެންސީތަކުން ވަނީ ޣާޒިއްޔާ ޓައުން އަށް ސަހްޔޫނީން އިތުރު ހަމަލާއެއް ވެސް ދީފަ އެވެ. އޭއެފްޕީގެ ނޫސް އެޖެންސީން ބުނި ގޮތުގައި ހަމަލާ ދީފައިވަނީ ދިރިއުޅޭ އިމާރާތަކަށް ކަމަށާއި، އިމާރާތްތަކުގެ އަޑިން ކުޑަކުއްޖަކު ސަލާމަތް ކޮށްފައިވާ ކަމަށެވެ.

ސަހްޔޫނީންގެ އަސްކަރިއްޔާއިން ބުނެފައި ވަނީ އިރުމަތީ ލުބުނާނުގެ އެންމެ ބޮޑު ސިޓީއާއި ޔުނެސްކޯއިން ކަނޑައަޅާފައިވާ ރޯމަނުންގެ ހާދަރުތައް ހިމެނޭ ލުބުނާނުގެ ބާލްބެކް ސަރަހައްދުގައި ހުރި ހިޒްބުاللهއާ ގުޅުން ހުރި ފެސިލިޓީތަކަށް ހަމަލާތައްއަމާޒުކުރާނެ ކަމަށެވެ.

ލުބުނާނުގެ ޕަބްލިކް ހެލްތު މިނިސްޓްރީން ބުނާ ގޮތުގައި 2023 ވަނަ އަހަރުގެ އޮކްޓޯބަރު މަހުން ފެށިގެން ސަހްޔޫނީން ލުބުނާނަށް ދިން ހަމަލާތަކުގައި 2،986 މީހުން މަރުވެފައިވާއިރު، އޭގެ ތެރޭގައި ފާއިތުވި 24 ގަޑިއިރުގެ ތެރޭގައި 18 މީހުން މަރުވެ 83 މީހުން ވަނީ ޒަހަމްވެފަ އެވެ.