ސަހްޔޫނީންގެ އަސްކަރިއްޔާއިން ސީރިއާގެ ވެރި ރަށް ދިމިޝްގަށް ހަމަލާދީފި ކަމަށް ބޭރުގެ ނޫސްތަކުން ރިޕޯޓްކޮށްފިއެވެ.

މި ހަމަލާގައި ދިމިޝްގެ ދެކުނުން އޮންނަ ސައްޔިދާ ޒައިނަބް ސަރަހައްދުގައި ބޮޑު ދުންގަނޑެއް ފެތުރިފައިވާ ކަމަށް އަލްޖަޒީރާ ނޫހުން ވަނީ އެ ނޫހަށް ލިބިފައިވާ ވީޑިއޯއެއްގެ އަލީގައި ކަށަވަރުކޮށްދީފައެވެ.

ނިރުބަވެރިން ސީރިއާއަށް ދިން މި ހަމަލާގައި މިހާތަނަށް ލިބުނު ގެއްލުންތަކުގެ ތަފްސީލެއް އަދި ލިބިފައެއް ނުވެއެވެ.

ސަހްޔޫނީން އަންނަނީ އިސްލާމީ ބޮޑެތި ގައުމުތަކަށް ހުއްޓުމެއް ނެތި ހަމަލާދީ އެތައް ބަޔަކު ޝަހީދުކުރަމުންނެވެ.

މިގޮތުން ފަލަސްތީން، އިރާން އަދި ލުބްނާނަށް ހުއްޓުމެއްނެތި ހަމަލާ ދެމުން އަންނައިރު މި ހަމަލާތަކަށް މިހާރު އަހަރަކަށްވުރެ ގިނަ ދުވަސްވެއްޖެއެވެ.