އިންޑިއާގެ އުތުރުގެ އުއްތަރަކަންދު ސްޓޭޓުގެ ފުން ގޯޅިގަނޑަކަށް ބަހެއް ވެއްޓި 36 މީހުން މަރުވެ އެތައް ބަޔަކު ޒަހަމްވެފައިވާ ކަމަށް އޮފިޝަލުންނާއި އިންޑިއާގެ މީޑިއާތަކުން ބުނެފި އެވެ.
މި އެކްސިޑެންޓް ހިނގާފައިވަނީ ހިމާލަޔާގެ އުއްތަރަކަންދު ސްޓޭޓްގެ އަލްމޯރާ ޑިސްޓްރިކްޓްގެ މާޗުލާ ސަރަހައްދުގައެވެ.
ނޫސްވެރިންނަށް މައުލޫމާތު ދެއްވަމުން އިސް އޮފިޝަލަކު ވިނީތު ޕާލް ވިދާޅުވީ މި އެކްސިޑެންޓްގައި 36 މީހުން މަރުވެފައިވާ ކަމަށާއި، ޒަހަމްވި ބައެއް މީހުން ހާއްސަ ފަރުވާއަށް އެއާލިފްޓްކޮށްފައިވާ ކަމަށެވެ.
މި ބަސް ދަތުރުކުރަމުން ދިޔައީ ގަރުހަވާލް ޑިސްޓްރިކްޓުން ރާމްނަގަރ އަށެވެ. އެ އުޅަނދުގައި މަދުވެގެން 42 ފަސިންޖަރުން ތިބި ކަމަށް ލޯކަލް ޕޮލިސް އޮފިސަރެއް ކަމަށްވާ ދޭވެންދްރާ ޕިންޗާ ރޮއިޓާސް ނިއުސް އެޖެންސީއަށް ކިޔައިދިނެވެ.
ސަރުކާރުގެ ސަލާމަތީ ޓީމުތަކުން އާންމުކުރި ފޮޓޯތަކުން ފެންނަ ގޮތުގައި ބަހުގެ ކުދިކުދި ކޮތަޅުތައް ބޯ އަޑީގައި ހުރިއިރު، އުޅަނދުގެ ކުރިމަތީ ބުރިވެފައިވާ ފަރާތް ގާތްގަނޑަކަށް ފަޅައިގެން ގޮސްފައިވެ އެވެ.
