ޣައްޒާގެ ސްކޫލަކަށް އަނެއްކާވެސް ހަމަލާދީ 12 މީހުން ޝަހީދުކޮށްލައިފި ކަމަށް ރިޕޯޓްތަކުން ހާމަކޮށްފިއެވެ.
މި ހަމަލާ ދީފައިވަނީ ޣައްޒާ ސިޓީގެ ހުޅަނގުން އޮންނަ ޝަތީ ރެފިއުޖީ ކޭމްޕުގައި ހުރި ސްކޫލަކަށެވެ.
އެސްކޫލަކީީ ސަހްޔޫނީން ޣައްޒާއަށް 07 އޮކްޓޯބަރު 2023 އިން ފެށިގެން ދޭން ފެށި ހަމަލާތަކާއި ގުޅިގެން ގެދޮރު ގެއްލިފައި ތިބި މީހުން ބޯހިޔާވަހިކަން ހޯދަމުން ދިޔަ ސްކޫލެކެވެ.
ސަހްޔޫނީން ޣައްޒާއަށް ދެމުން އަންނަ ހަމަލާތަކަށް ހުއްޓުމެއް އައިސްފައި ނުވާއިރު، ކޮންމެ ދުވަހަކު ގޮތަކަށް އެގައުމުން އަންނަނީ ޣައްޒާގެ އެކި ސަރަހައްދުތަކަށް ވަރުގަދަ ހަމަލާތައް ދެމުންނެވެ. މި ހަމަލާތައް އާންމުކޮށް އަމާޒުކޮށްފައި ހުންނަނީ އާންމުން އެއްވެ އުޅޭ ހޮސްޕިޓަލްތައް ކައިރި، ރެފިއުޖީ ކޭމްޕް ސަރަހައްދުތަކަށެވެ.
ފަލަސްތީނުގެ ހެލްތް މިނިސްޓްރީން އާންމުކޮށްފައިވާ ތަފާސް ހިސާބުތަކުން ދައްކާ ގޮތުގައި މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން މިއަދާއި ހަމައަށް 43،000 އަށްވުރެ ގިނަ ފަލަސްތީނުގެ މީހުން ޝަހީދުކޮށްލާފައިވެއެވެ. އަދި އެކިވަރުގެ ޒަހަމްތައް ދިން މީހުންގެ އަދަދު 100،000 އަށްވުރެ މައްޗަށް ވަނީ އަރާފައެވެ.
