ލުބުނާނުގެ ހިޒްބުﷲއިން ބޭނުންކުރަމުންދިޔަ ޕޭޖަރުތަކެއް ސެޕްޓެމްބަރު މަހު ތެރޭގައި ސަހްޔޫނީން ގޮއްވާލުމާ ގުޅިގެން، ލުބުނާނުން އެ މައްސަލަ އދ ގެ ލޭބާ އޮގަނައިޒޭޝަން (އައިއެލްއޯ) އަށް ހުށަހަޅައިފިއެވެ.

ލުބުނާނުގެ ލޭބަ މިނިސްޓަރު މުސްތަފާ ބައިރަމް ރަސްމީކޮށް ޝަކުވާ ހުށަހެޅީ މިދިޔަ އަންގާރަ ދުވަހު ސްވިޒަލޭންޑްގެ ޖެނީވާގައި ހުންނަ އދ. ހެޑް އޮފީހަށެވެ.

ބޭރުގެ ނޫސްތަކުން ރިޕޯޓުކޮށްފައިވާ ގޮތުގައި ސެޕްޓެމްބަރު 23 ވަނަ ދުވަހު ހިނގި އެ ހާދިސާއަކީ މުއާމަލާތް ކުރުމަށް އެ ޑިވައިސްތައް ބޭނުންކުރި ހިޒްބުاللهގެ ހަތިޔާރު އެޅި ޖަމާއަތަށް އަމާޒުކޮށްގެން ގޮވުންތަކެއް ކަމަށް ބެލެވެއެވެ.

އެ ހަމަލާގެ ތުހުމަތު ސަހްޔޫނީންގެ ބޮލުގައި ގިނަ ބަޔަކު އަޅުވާއިރު، ހަމަލާދިން ކަމަށް ނުވަތަ ނުދޭ ކަމަކަށް ވެސް އެގައުމުން މިހާތަނަށްވެސް ބުނެފައެއްނުވެއެވެ.

ސަހްޔޫނީން ދެމުންދާ ހަމަލާތަކުގެ ސަބަބުން މިދިޔަ އޮކްޓޯބަރު މަހުން ފެށިގެން މިހާތަނަށް ލުބުނާނުގައި 3،000 އަށް ވުރެ ގިނަ މީހުން ޝަހީދުވެ، 13،492 މީހުން ޒަޚަމުވެފައިވާ ކަމަށް ލުބުނާނުގެ މިނިސްޓްރީ އޮފް ޕަބްލިކް ހެލްތުން ބުނެއެވެ.

ލުބުނާނަށް ދިން ހަމަލާތަކުގެ ސަބަބުން މިލިއަނަކަށް ވުރެ ގިނަ މީހުންގެ ގެދޮރު ވަނީ ގެއްލިފައެވެ.