މިދިޔަ ސެޕްޓެމްބަރު މަހު ލުބުނާނުގައި ޕޭޖަރުތަކެއް ގޮއްވާލަން އަމުރުކުރި ކަމަށް ސަހްޔޫނީންގެ ބޮޑުވަޒީރު ބެންޖަމިން ނަތަންޔާހޫ އެއްބަސްވެއްޖެއެވެ.

އެގައުމުގެ މީޑިއާއިން ރިޕޯޓްކުރާގޮތުގައި، ނަތަންޔާހޫ ވަނީ އޭނާގެ ކެބިނެޓާއި މުޚާތަބުކުރަމުން، ހިޒްބުﷲ ގެ ލީޑަރު ހަސަން ނަސްރުﷲ އަވަހާރަކޮށްލަން ދިން ހަމަލާ އާއި ޕޭޖަރު ގޮއްވާލި ހަމަލާއަކީ ވެސް އެގައުމުގެ ސަލާމަތާއި ގުޅޭ ސީނިއާ އޮފިޝަލުންނާއި ސިޔާސީ ފަރާތްތަކާއި ދެކޮޅަށް އެންގި އެންގުމެއް ކަމަށް ބުނެފައެވެ.

ޕޭޖަރުތައް ހިޒްބުﷲ އަށް ހަވާލު ކުރުމުގެ ކުރިން އެހެން ބަޔަކު އޭގައި ގޮވާތަކެތި ހަރުކޮށްފައިވާކަމަށް ކަމާ ބެހޭ ފަރާތްތަކުން ބުނެފައިވާއިރު، މި ގޮވުމުގައި ލުބުނާނުގައި ހުންނަ އީރާނުގެ ސަފީރު މުޖުތަބާ އަމާނީ ވެސް ޒަހަމްވެފައިވާއިރު، މީގެ މަސްތަކެއް ކުރިން ހިޒްބުﷲ ގެ ލީޑަރު ހަސަން ނަސްރުﷲ ވަނީ އިސްރާއީލުން ޖާސޫސު ކުރުމުގެ ފުރުސަތު އޮންނާނެތީ މުޖާހިދުން ސްމާޓްފޯނު ބޭނުން ނުކުރުމަށް އަންގަވާފައެވެ.

މިދިޔަ ސެޕްޓެމްބަރު މަހުގެ 17 ވަނަ ދުވަހު ސަހްޔޫނީން ލުބުނާނުގައި ޕޭޖަރުތަކެއް ގޮއްވާލިއިރު، މި ހަމަލާގައި 37 މީހުން މަރުވެ 3،000 އަށް ވުރެ މީހުން ވަނީ ޒަހަމްވެފައެވެ.