ޔުނައިޓެޑް އަރަބް އެމިރޭޓްސް (ޔޫއޭއީ) ގެ ވެރިރަށް އަބޫދާބީގައި ޔަހޫދީއަކު މަރާލި މައްސަލައެއްގައި އެ ގައުމުން ތިން މީހަކު މިހާތަނަށް ހައްޔަރުކޮށްފައިވާ ކަމަށް އެ ގައުމުން ބުނެފިއެވެ.

އިސްރާއީލް-މޮލްޑޯވާ ދަރިކޮޅުގެ ރައްޔިތެއް ކަމަށްވާ ޒްވީ ކޯގަން 28، މަރާލި މައްސަލައިގައި ތިން މީހަކު ހައްޔަރުކުރި ކަން ކަށަވަރުކޮށްދީފައިވާއިރު އެ ގައުމުން އިތުރަށް ބުނެފައިވަނީ އެ ގައުމުގައި ހަމަޖެހުން ގާއިމުވެފައި އޮތުމުން ބޭނުން ކުރަން ޖެހުނު ކޮންމެ ބާރެއް ބޭނުން ކުރާނެ ކަމަށެވެ.

ޒްވީ ކޯގަންއަކީ ޔޫއޭއީގައި ހުންނަ ޔަހޫދީ ޖަމާއަތެއްގެ މަންދޫބެވެ. މިދިޔަ ބުރާސްފަތި ދުވަހުން ފެށިގެން ގެއްލިގެން ހޯދަމުން ދަނިކޮށް ޒްވީ މަރާލާފައި އޮއްވައި ފެނުނީ އިއްޔެއެވެ.

އިސްރާއީލްގެ ގައުމީ ސަލާމަތާ ބެހޭ ކައުންސިލުން ވަނީ ކޮންމެހެން މަޖުބޫރު ހާލަތެއްގައި ނޫނީ ޔޫއޭއީއަށް ދަތުރު ނުކުރަން އިލްތިމާސްކޮށްފައެވެ.