އިންޑޮނޭޝިއާގައި ބިންގަނޑު ކަނޑައިގެން ދިއުމުގެ ހާދިސާއެއްގައި 16 މީހުން މަރުވެއްޖެ ކަމަށް އެ ގައުމުން ރިޕޯޓްކޮށްފިއެވެ.

ރިޕޯޓްތައް ބުނާ ގޮތުން ސިފައިންނާއި ރެސްކިއު އޮފިޝަލުން ވަނީ ހާލުގައި ޖެހުނު ހަތަރު ސަރަހައްދެއްގައި ހަރަކާތްތެރިވާން ފަށައިފައެވެ.

އެގޮތުން މިހާތަނަށް ހަ މީހަކު ގެއްލިފައިވާ ކަމަށް ރިޕޯޓްކޮށްފައިވެއެވެ.

ބޯކޮށް ވާރޭ ވެހުމުގެ ސަބަބުން ފަރުބަދަތައް ކަނޑައިގެން ގޮސް ގަސްތައް ވެއްޓި ކޯރުތައް ކަނޑައިގެން ގޮސް އުތުރު ސުމަޓްރާ ޕްރޮވިންސްގެ ފަރުބަދަމަތީ ހަތަރު ޑިސްޓްރިކްޓެއްގެ ގެތަކަށް ފެން ވަދެ ދަނޑުތައް ހަލާކުވެފައިވާ ކަމަށް އޮފިޝަލުން ބުނެއެވެ.

ލޯކަލް ޑިޒާސްޓާ މެނޭޖްމަންޓް އެޖެންސީގެ ވެރިޔާ ޖުސްޕްރީތު އެމް ނަދީކް ވިދާޅުވީ ކަރޯ ޑިސްޓްރިކްޓްގެ ރިސޯޓް ސަރަހައްދެއް ކަމަށްވާ ސެމަންގަތު ގުނޫންގްގައި މަރުވި މީހުންނާއި ގެއްލުނު މީހުން ހޯދުމުގެ މަސައްކަތް ފުލުހުންނާއި ސިފައިންނާއި ރެސްކިއު ވޯކަރުން އެކްސްކަވޭޓަރުތަކާއި ދަނޑުވެރިކަމުގެ އާލާތްތައް ބޭނުން ކޮށްގެން ކުރަމުން އަންނަ ކަމަށެވެ.