ތައިލެންޑަށް މިހާރު ކުރަމުންދާ ވިއްސާރައިގައި ފެންބޮޑުވުމުގެ ސަބަބުން ނުވަ މީހުން މަރުވެ، 13،000 އަށް ވުރެ ގިނަ މީހުން ގެދޮރު ގެއްލިއްޖެ ކަމަށް އެ ގައުމުގެ ޑިޒާސްޓާ އެޖެންސީއިން ހާމަކޮށްފިއެވެ.

އެ ގައުމުގެ ޑިޒާސްޓާ އެޖެންސީގެ ރަސްމީ ފޭސްބުކް ޕޭޖްގައި ބުނެފައިވަނީ ތައިލެންޑުގެ ދެކުނުގެ އަށް ޕްރޮވިންސެއްގައި ފެންބޮޑުވުމުގެ ސަބަބުން 553،921 ގޭބިސީއަށް އަސަރުކޮށް، ނުވަ މީހުން މަރުވުވެފައިވާ ކަމަށެވެ.

ފެންބޮޑުވުމުގެ ސަބަބުން ޕައްޓާނީ ޕްރޮވިންސްގެ މެޑިކަލް ފެސިލިޓީތަކަށް ގެއްލުން ވިޔަ ނުދިނުމަށް ދެ ހޮސްޕިޓަލަކުން އޮޕަރޭޝަންތައްވެސް މެދުކަނޑާލާފައިވާ ކަަމަށްވެސް މީޑިއާ ރިޕޯޓްތައް ބުނެއެވެ.

ތައިލެންޑުގެ މޫސުމާ ބެހޭ ގައުމީ އިދާރާއިން ބުނީ އަންނަ ހަފުތާގެ ނިޔަލަށް އެ ގައުމުގެ ދެކުނުގެ ބައެއް ސަރަހައްދުތަކަށް ބޯކޮށް ވާރޭ ވެހޭނެ ކަމަށެވެ.