ސޫދާންގެ ދެކުނުގެ ސަރަހައްދުގައި ހަލުވިކަމާއެކު ކޮލެރާ ފެތުރެން ފަށައިފި އެވެ.
ފްރާންސްގެ އިންސާނިއްޔަތަށް މަސައްކަތްކުރާ ޖަމިއްޔާއެއް ކަމަށްވާ ޑޮކްޓާސް ވިތައުޓް ބޯޑާސް އިން ހުކުރު ދުވަހު ބުނީ ދެކުނު ސޫދާނުގެ އަޕަރ ނައިލް ސްޓޭޓްގެ ވެރިރަށް މަލާކަލްއިން ޖުމްލަ 737 ކޮލެރާ ކޭސް ރިޕޯޓްކޮށްފައިވާ ކަމަށެވެ.
ކޮލެރާ އަކީ އެންޓިބަޔޮޓިކްސް އާއި ހައިޑްރޭޝަން ބޭނުންކޮށްގެން ފަރުވާ ކުރެވޭ ޑައިރިއާގެ އެކިއުޓް ވައްތަރެއް ނަމަވެސް ފަރުވާ ނުދީ ދޫކޮށްލައިފިނަމަ ގަޑިއިރުތަކެއްގެ ތެރޭގައި މަރުވެދާ ފަދަ ނުރައްކާތެރި ބައްޔެކެވެ.
މިއީ އާންމުގޮތެއްގައި ނަޖިހުން ފެތުރޭ ޖަރާސީމެއްގެ ސަބަބުން ދިމާވާ ބައްޔެކެވެ. މި ބަލި ޖެހެނީ ޖަރާސީމު ކާބޯތަކެއްޗާ އެކުވެގެންނެވެ.
ޑޮކްޓަރސް ވިތައުޓް ބޯޑާސްއިން ނެރުނު ބަޔާނެއްގައި ބުނީ އެ ކުންފުނީގެ ޓީމުތަކުން މަލަކަލް ޓައުން ހޮސްޕިޓަލް ކައިރީގައި 100 އެނދުގެ ކޮލެރާ އަށް ފަރުވާދޭ ސެންޓަރެއް ގާއިމުކޮށްފައިވާ ކަމަށެވެ. އެހެން ނަމަވެސް އެތަންތަނުގައި ފެނާއި ނަރުދަމާގެ ނިޒާމް ހަރުދަނާ ކުރަން ޖެހޭ ކަމަށް ބުނެފައިވެ އެވެ.
އެޖަމިއްޔާއިން ހާމަކޮށްފައިވާ ގޮތުގައި ޑިސެމްބަރު މަހުގެ ތިން ވަނަ ދުވަހުގެ ނިޔަލަށް ދެކުނު ސޫދާނުން ކޮލެރާއަށް 1،526 މީހަކު ޕޮޒިޓިވްވެފައިވާ ކަމަށެވެ.
