ރައްޔިތުންނާއި ގުޅި ހަނގުރާމަވެރި ޖަމާއަތްތަކުން ސީރިޔާގެ ވެރިރަށް ދިމިޝްކު ހިފުމުން، ރައީސް ބައްޝާރުލް އަސަދު ފިލައިފި އެވެ.

ސީރިއާގައި 24 އަހަރު ވެރިކަން ކުރެއްވި ބައްޝާރުލް އަސަދު ފްލައިޓެއްގައި ފިލައިގެން ގޮސްފައިވާ ކަމަށް ރޮއިޓާސްއިން ބުނެފައިވެ އެވެ. ނަމަވެސް އެމަނިކުފާނު ވަޑައިގަތީ ކޮންތަނަކަށް ކަމެއް ނޭނގޭ ކަމަށް ބުނެފައިވެ އެވެ.

ސީރިއާގެ ދާހިލީ ހަނގުރާމައަށް 13 އަހަރަށް ފަހު ބައްޝާރު އާއިލާގެ 54 އަހަރުވީ ވެރިކަން ނިމުމަކަށް ގެނެސްފައި ވާއިރު ބޮޑުވަޒީރު މުހައްމަދު އަލް ޖަލާލީ ވަނީ އޭނާ އަދިވެސް ހުންނެވީ ދިމިޝްގުގައި ކަމަށާއި ކޮންމެ ބަޔަކު ވެރިކަމަށް އައި ނަމަވެސް އެ ބަޔަކަށް އެއްބާރުލުން ދެއްވަން ތައްޔާރަށް ހުންނެވިކަން އިއުލާނުކުރައްވާފައި އެވެ.

ހަނގުރާމަވެރިން ވަނީ ސޫރިޔާގެ މައި އެއާޕޯޓުތައް އެ މީހުންގެ ކޮންޓްރޯލްގެ ދަށަށް ގެނެސްފަ އެވެ.

ދިމިޝްކުގައި ތިބި ސީރިއާގެ އެތައް ހާސް ސިފައިން ވެސް ވަނީ ފިލައިގެން އެހެން ތަންތަނަށް ހިޖުރަ ކޮށްފައި ކަމަށް އަލްޖަޒީރާއިން ބުންޏެވެ.

ބައްޝާރު ވެރިކަމަށް ވަޑައިގަތީ 14 މާޗް، 1971 އިން ފެށިގެން ވެރިކަމުގައި ހުންނެވި ބައްޕާފުޅު ހާފިޒުލް އަސަދު 2000 ވަނަ އަހަރު އަވަހާރަވުމާ އެކު އެވެ.

މިދިޔަ މަހުގެ ފަހު ހަފުތާއިން ފެށިގެން ސީރިއާގެ ހަނގުރާމަވެރިން ބޮޑެތި ކުރިއެރުންތައް ހޯދަމުން އަންނަ މުހިންމު އެތައް ސިޓީއެއް މިހާރު ވަނީ ހިފައިފަ އެވެ. އަދި ރޭ އިރާކޮޅުގެ ވަގުތެއްގައި ވަނީ ހިމްސް ސިޓީ ވެސް ހިފާފައިވާކަން އިއުލާނުކޮށްފަ އެވެ.

ހަނގުރާމަ ވެރިންވަނީ ރޭ ފަތިހު އެމީހުންގެ ބާރުތައް ވެރިރަށް ދިމިޝްގަށް ވަދެގަނެ ސޫރިޔާގެ ރަސްމީ ޓީވީ އާއި ރޭޑިއޯ އަދި ސަރުކާރުގެ ބައެއް އިމާރާތްތައް ހަނގުރާމައަކާނުލައި އެމީހުންގެ ކޮންޓްރޯލްގެ ދަށަށް ގެންދިޔަކަން ކަށަވަރުކޮށްދީފަ އެވެ.