ސަހްޔޫނީން ސީރިއާގެ އެކި ސަރަހައްދުތަކަށް ހަމަލާތައް ދޭން ފަށައިފިއެވެ.
ސީރިއާ ސަރުކާރާއި ދެކޮޅަށް އެގައުމުގެ އިދިކޮޅު ހަނގުރާމަވެރިން ފެށި ހަނގުރާމައަށް އެއް ދުވަސް ނުވަނީސް އެގައުމުގެ ރައީސް، ބަޝާރުލް އައްސަދު ވަނީ ގައުމު ދޫކޮށް ފިއްލަވާފައިވާ މި ދަނޑިވަޅުގައި ސަހްޔޫނީންގެ އަސްކަރިއްޔާއިން ވަނީ ސީރިއާގެ ސަރަހައްދުތަކަށް ވަދެގަނެފައެވެ.
މިގޮތުން، އަސްކަރީ ބައެއް ޓޭންކުތަކުންނާއި އެހެނިހެން ވެހިކަލްތަކުން ސަހްޔޫނީންގެ އަސްކަރިއްޔާއިން ވަނީ އަލް-ގަހްތަނިޔާއިން ގުނެއިތުރާއަށް ވަދެގެންފައެވެ. އަދި މިހާރު އަލް-ރަވާބީ ސަރަހައްދާއި ހަމައަށް ގޮސްފައިވާ ކަމަށްވެސް ރިޕޯޓްތަކުން ހާމަކޮށްފައިވެއެވެ.
ސަހްޔޫނީން އަންނަނީ އެމީހުން ވަންނަމުން އަންނަ ސަރަހައްދުތަކަށް ބޮމުގެ ހަމަލާތައް އަމާޒުކުރަމުންނެވެ.
ސީރިއާގެ އިދިކޮޅު ހަނގުރާމަވެރިން އެގައުމުގެ ސަރުކާރާއި ދެކޮޅަށް ފެށި ހަނގުރާމައިގެ ތެރެއިން އެގައުމުގެ ރައީސް، ބަޝާރުލްއައްސަދުގެ 14 އަހަރު ވީ ދިގު އަނިޔާވެރި ވެރިކަން ވަނީ ވައްޓާލާފައެވެ.
ސަހްޔޫނީން މިހާތަނަށް ދީފައިވާ ހަމަލާތަކުގައި ގިނަ އަދަދެއްގެ ބަޔަކު މަރުވެފައިވާ ކަމަށް ރިޕޯޓްކޮށްފައިވާ އިރު މަރުވެފައިވާ މީހުންގެ އަދަދު އަދި ކަށަވަރުވެފައިނުވެއެވެ.
