ސީރިޔާގެ ރައީސް ބައްޝާރުލް އަސަދުގެ ވެރިކަން ވައްޓާލުމަށްފަހު، އެ ގައުމަށް ހިން ދެމިލަން ފުރުސަތު ނުދީ އަސްކަރީ ވަރުގަދަ ހަމަލާތަކުގައި ސީރިއާގެ މުހިއްމު ބިންތަކަށް ސަހްޔޫނީން އަތްގަދަކުރަން ފަށައިފި އެވެ.

ސީރިއާގެ ރައީސް ބައްޝާރުލް އަސަދު ގައުމު ދޫކުރައްވައި ރަޝިއާއަށް ހިޖުރަކުރެއްވުމާ ގުޅިގެން، ސީރިއާ މިހާރު އޮތީ ހަނގުރާމަވެރިންގެ އަތްދަށުގަ އެވެ. ސީރިއާގައި މި ވަގުތު ހިންގާނެ ރަސްމީ ސަރުކާރެއް ނެތެވެ. ވެރިއަކު ހޮވުމަށް އިންތިހާބެއް ބާއްވާނެ ދުވަހެއް އަދި ކަށަވަރެއް ނުވެ އެވެ.

ސީރިއާގައި ދާހިލީ ހަނގުރާމަ 2011 ވަނަ އަހަރު ފެށުނު ފަހުން ސަހްޔޫނީން ވަނީ އެ ގައުމުގައި އެތައް ސަތޭކަ ހަމަލާއެއް ދީފަ އެވެ. މައިގަނޑު ގޮތެއްގައި ހަމަލާތައް އަމާޒުކުރަނީ އަސްކަރިއްޔާއަށާއި އީރާނަށް ތާއީދުކުރާ ޖަމާއަތްތަކަށެވެ. ސަހްޔޫނީން ސީރިއާއަށް ދޭ ވަކިވަކި ހަމަލާތަކާ ބެހޭ ގޮތުން ވަރަށް މަދުން ނޫނީ ވާހަކައެއް ނުދައްކަ އެވެ. އެކަމަކު އީރާންގެ ބާރު ސީރިއާގައި ގަދަކުރިޔަ ނުދޭނެ ކަމަށް އަބަދުވެސް ބުނެ އެވެ.

އަސަދު ވެރިކަން ކުއްލި އަކަށް ވެއްޓުމުގެ ފައިދާ ނަނގާ ސަހްޔޫނީން މިހާރު އަންނަނީ ސީރިއާގެ ސަރަހައްދެއް ކަމަށްވާ ގޯލާންގެ އުސް ބިންތައް ވެސް އެމީހުންގެ ބެލުމުގެ ދަށަށް ގެންނަ މުންނެވެ.

ސަހްޔޫނީންގެ މި އަމަލުތައް ހުރި ގޮތުން އެ ގައުމުން ސީރިޔާ ހިފަން އުޅޭ ކަމަށް ރިޕޯޓްތަން ބުނަމުންދާއިރު، އިޒްރޭލުން އަންނަނީ ސީރިޔާގެ ބޯޑަރު ހުރަސްކޮށް އެތެރެއަށް ވަންނަމުންނެވެ.

އަދި މީގެ ކުރިން ސީރިއާ-ސަހްޔޫނީން ބޯޑަރުގައި އދގެ ސުލްހަ ބަލަހައްޓާ ސިފައިން ތިބި ސަރަހައްދުގައި ވެސް ސަހްޔޫނީން ވަނީ އަސްކަރިއްޔާ ވަރުގަދަކޮށްފަ އެވެ.

އދއަށް ހާއްސަކޮށްފައި އޮތް ސަރަހައްދަކަށް ސަހްޔޫނީ ސިފައިން ވަނުމާ ގުޅިގެން ކުރި ޝަކުވާތަކަށް ސަހްޔޫނީންގެ ވެރިން ބުނީ އެއީ އދއަށް އެހީވުމަށް ހަރަކާތްތެރިވާ ސިފައިން ކަމަށެވެ.

ރިޕޯޓްތައް ބުނާ ގޮތުން އިޒުރޭލާއި ސީރިއާގެ ބޯޑާރުގައި ހަދާފައި އޮތް ބަފާ ޒޯން -- ސަހްޔޫނީންނާއި ސީރިއާއިން ފޯރިމަރާ ސަރަހައްދު، ސަހްޔޫނީންގެ ފުރިހަމަ ބާރުގެ ދަށަށް ގެންދިއުމަށް ނަތަންޔާހޫ ވަނީ އަސްކަރިއްޔާއަށް އަމުރުކުރައްވާފަ އެވެ.

މިކަމާއި ގުޅިގެން އދ. އިން ވަނީ ސަހްޔޫނީން ބައިނަލްއަގުވާމީ އެއްބަސްވުންތަކާ ހިލާފަށް މަސައްކަތް ކުރަމުންދާ ކަމަށް ތުހުމަތުކޮށް، އެކަން ވަގުތުން ހުއްޓާލަން ގޮވާލައިފަ އެވެ.

އަސަދުގެ ސަރުކާރު ވެއްޓިގެން ދިޔުމަކީ ސަހްޔޫނީންނަށް ލިބުނު ބޮޑު ކާމިޔާބީ އެއްކަމަށް ނަތަންޔާހޫ ސިފަކުރެއްވިއިރު އަސަދުގެ ވެރިކަން ވެއްޓުމާއެކު ސަހްޔޫނީން ވަނީ ސޫރިޔާގެ ސައެންޓިފިކް ރީސާޗް ސެންޓަރުތަކަށާއި އަސްކަރީ ޓެކްނޮލޮޖީގެ ދިރާސާތަކާބެހޭ މަރުކަޒުތަކަށާއި ބަރުހަތިޔާރު ހުރި ގުދަންތަކަށް ވައިގެ ގިނަ ހަމަލާތަކެއްދީ އެތަންތަން ހަލާކުކޮށްލާފަ އެވެ.

ބައްޝާރުގެ ސަރުކާރު ވެއްޓުމުގެ ކުރިން އީރާނުން ހިޒްބުﷲ އަށް ހަތިޔާރު ފޯރުކޮށްދެނީ ސޫރިޔާގެ މަގުންނެވެ. ނަމަވެސް މިހާރު މި ފުރުސަތު އީރާނަށް ބަންދުވީއެވެ. އެހެންކަމުން ހިޒްބުﷲގެ އަސްކަރީ ގާބިލްކަމަށް މިކަމުގެ ނޭދެވޭ އަސަރު މުސްތަގްބަލްގައި ކުރާނެއެވެ.

އީރާން، ހަމާސް އަދި ހިޒްބުﷲ ޖަމާއަތް ބަލިކުރުމަށް ސީރިޔާއަށް ސަހްޔޫނީންގެ ފުލް ކޮންޓްރޯލް ގެނައުމަށް ބޭނުންވާ އުދުވާންތައް އެދަނީ އިތުރަށް ފުޅާ ކުރަމުންނެވެ. ދުނިޔެ އޮތީ ކުޅި ބަލާށެވެ. ހާއްސަކޮށް އަރަބިން ތިބީ ގަދަ ނިއްޖެއްގައި އެވެ.

ސީރިޔާގެ ސަރުކާރާއި ދެކޮޅަށް ހަނގުރާމަކުރާ ޖަމާއަތުން ސީރިޔާގެ ގިނަ ސަރަހައްދުތަކެއް އެމީހުންގެ ބާރުގެދަށަށް ގެންދިއުމާއެކު، އަސަދަށް ވަނީ މޮސްކޯ އިން ރައްކާތެރިކަން ދީފަ އެވެ.