ސަހްޔޫނީން ދެމުން އަންނަ ހަމަލާތަކުގައި ޣައްޒާގެ އުތުރުގައި ހަރަކާތްތެރި ވަމުން އަންނަ ހަމައެކަނި ކަށީގެ ޑޮކްޓަރު ޝަހީދުކޮށްލައފިއެވެ.

އެ ގައުމުގެ މީޑިއާ ރިޕޯޓްތައް ބުނާގޮތުގައި ގާޒާގެ އުތުރުގެ ކަމަލް އަދްވާން އާއި އަލް-އަވްދާ ހޮސްޕިޓަލްތަކާ ދެމެދު އެމްބިއުލާންސްގައި ދަތުރުކުރަމުން ދަނިކޮށް އިސްރާއީލުގެ ޑްރޯނަކުން ފަލަސްތީނުގެ ޑޮކްޓަރެއްގެ ގަޔަށް ބަޑިޖަހައި ޝަހީދުކޮށްލާފައިވާ ކަމަށެވެ.

ސަހްޔޫނީންގެ އަސްކަރިއްޔާއިން ތަކުރާރުކޮށް ގާޒާގެ އެކި ކަންކޮޅުތަކުގައި ޑޮކްޓަރުންނަށާއި ސިއްހީ ހިދުމަތްތެރިންނަށް އަމާޒުކޮށް ހަމަލާ ދީފައިވާއިރު، ގާޒާގައި ސަހްޔޫނީން ހިންގަމުންދާ ގަތުލުއާންމު ފެށުނީއްސުރެ 1057 ސިއްހީ ހިދުމަތްތެރިން ޝަހީދުކޮށްލާފައިވާކަމަށް ގާޒާގެ ހެލްތް މިނިސްޓްރީން ބުނެއެވެ.

ސަހްޔޫނީންގެ ބޭނުމަކީ ހަމަލާތަކުގައި ޒަޚަމްވާ ފަރާތްތަކަށް އެހީތެރިކަމާއި ފަރުވާ ފޯރުކޮށްދޭ ހުރިހާ މަގެއް ބަންދުކުރުމެވެ.

މި ގަތުލުއާންމު އަށް އަހަރަކަށް ވުރެ ގިނަ ދުވަސް ވެގެން ގޮސްފައިވާއިރު ސަހްޔޫނީންގެ ހަމަލާތައް ވަރުގަދަވެ، ފަލަސްތީނުގެ ރައްޔިތުންނާއި އެއްކޮޅަށް އަޑު އުފުލުން މަދުވެ ހަނގުރާމަ މިވަނީ "ނޯމަލައިޒް" ވެފައެވެ.

މީގެ އިތުރުން، ޣައްޒާއަށް އެހީ ވެއްދުމަށްވެސް ސަހްޔޫނީން އަންނަނީ ހުރަސް އަޅަމުންނެވެ.