ދެކުނު ކޮރެއާގެ ރައީސް ޔޫން ސުކް ޔޯލްއަށް އިތުބާރު ނެތް ކަމަށް ފާސްކޮށް ވެރިކަމުން އަޒުލުކޮށްފި އެވެ.

އެއާ އެކު ދެކުނު ކޮރެޔާގެ ގާނޫނުއަސާސީގެ ދަށުން ޔޫންގެ ރިޔާސީ ބާރުތައް ސަސްޕެންޑުވުމުން ރައީސްގެ ޒިންމާތަކާއި މަސްއޫލިއްޔަތުތަކާ ވަގުތީ ގޮތުން ޙަވާލުވެވަޑައިގަންނަވާނީ ބޮޑުވަޒީރު ހާން ޑަކް ސޫއެވެ.

މިއަދު ނެގި ވޯޓުގައި ޔޫންގެ އިތުބާރުނެތްކަމަށް ގާނޫނު ހަދާ މަޖިލީހުގެ 204 މެމްބަރުން ވޯޓު ދިނެވެ. ދެކުނު ކޮރެއާގެ ޓީވީން ބުނި ގޮތުގައި އެ ހުށަހެޅުމާ ދެކޮޅަށް 85 މެމްބަރުން ވޯޓު ދިންއިރު، ތިން ވޯޓު ކަރުދާސް ހަލާކުވެ އަށް ވޯޓު ކަރުދާސް ބާތިލް ކަމަށް ކަނޑައަޅާފައިވެ އެވެ.

ބޮޑުވަޒީރު ހާން ވިދާޅުވީ، މިހާރު އުފެދިފައި އޮތް ނުތަނަވަސްކަމުގެ ތެރެއިން ހަމަޖެހުން ގާއިމުކުރައްވަން މަސައްކަތް ކުރައްވާނެ ކަމަށެވެ.

ޔޫން މަގާމުން ދުރުކުރުމަށް ގޮވައިލައި ގާނޫނު ހަދާ މަޖިލީހުގެ ބޭރުގައި ގާތްގަޑަކަށް 200،000 އެއްހާ މީހުން ވަނީ މުޒާހަރާވެސްކޮށްފަ އެވެ.

މިއަދު ނެގި ވޯޓަކީ ޔޫން މަގާމުން ދުރުކުރުމަށް ދެވަނަ ފަހަރަށް ނެގި ވޯޓެވެ.

ރައީސްގެ އިތުބާރު ނެތް ކަމުގެ މައްސަލަ ދެން ފޮނުވާނީ ގައުމުގެ ދުސްތޫރީ ކޯޓަށެވެ. އެ ކޯޓަށް ޔޫން މަގާމުން ދުރުކުރުމާ ގުޅޭ ގޮތުން ގޮތް ނިންމަން 180 ދުވަސް ލިބޭނެ އެވެ. އަދި ރައީސް މަގާމުން ދުރުކުރަން ކޯޓުން ވެސް ނިމްމައިފި ނަމަ، ޔޫން ވާނީ ދެކުނު ކޮރެއާގެ ތާރީހުގައި އިތުބާރު ނެތް ކަމުގެ ވޯޓަކުން މަގާމުން ދުރުކުރި ދެވަނަ ރައީސަށެވެ.

މި މަހުގެ ތިން ވަނަ ދުވަހު ޔޫން އަސްކަރީ ގާނޫނު އިއުލާނުކުރެއްވީ އިދިކޮޅުން ބަޣާވާތެއް ކުރަން އުޅޭ ކަމަށާއި އުތުރު ކޮރެއާއާ ގުޅިގެން މަސައްކަތް ކުރާ ކަމަށް ތުހުމަތު ކުރައްވަ އެވެ. ނަމަވެސް ގާނޫނު ހަދާ މަޖިލީހުން ފާސްނުވުމުން އަސްކަރީ ގާނޫނު ދެތިން ގަޑިއިރުތެރޭގައި ވަނީ އަނބުރާ ގެންދަވާފަ އެވެ.

ރައީސް ޔޫން މަގާމުން ދުރުކުރަން އިދިކޮޅުން މަސައްކަތް ފެށިއިރު، ގާނޫން އަސާސީން ރައީސަށް ލިބިފައި އޮންނަ އިޚުތިޔާރުތައް ހިފެހެއްޓުމަށް ސަރުކާރު ހިންގާ ޕާޓީން އޮތީ ގޮވާލާފަ އެވެ.

ނަމަވެސް، އަސްކަރީ ގާނޫން އިއުލާންކުރެއްވުމަކީ ހެއްދުނު ވަރަށް ބޮޑު ގޯހެއް ކަމަށް ވިދާޅުވެ ރައީސް ޔޫން ވަނީ އާންމު ރައްޔިތުންގެ ކިބައިން މާފަށް އެދިވަޑައިގެންފަ އެވެ.

ގައުމަށް ހިޔާނާތްތެރިވެވަޑައިގަތް ކަމުގެ ތުހުމަތުގައި ޔޫނާ ދެކޮޅަށް ޖިނާއީ ތަހުގީގެއް މިހާރު ވަނީ ފަށައިފަ އެވެ. އަދި ގައުމު ދޫކުރައްވައި ވަޑައިނުގެންނެވޭ ގޮތަށް، ޔޫންގެ ޕާސްޕޯޓު ވެސް ވަނީ ހިފަހައްޓައިފަ އެވެ.