ސޫދާންގެ އުތުރުގެ ދާރްފޫރު ސަރަހައްދުގެ އަލް-ފާޝަރު ސިޓީގެ ހޮސްޕިޓަލަކަށް ދިން ޑްރޯން ހަމަލާއެއްގައި ނުވަ މީހުން މަރުވެ 20 މީހުން ޒަޚަމްވެއްޖެއެވެ.
ފެޑެރަލް މިނިސްޓްރީ އޮފް ހެލްތް އިން ވަނީ މިދިޔަ ހުކުރު ދުވަހު ދިން މި ހަމަލާގެ ޒިންމާ ޕެރަމިލިޓަރީ ރެޕިޑް ސަޕޯޓް ފޯސަސް (އާރްއެސްއެފް) ގެ ބޮލުގައި އަޅުވާފަ އެވެ. އޮފިޝަލުން ބުނާ ގޮތުގައި އެ ޖަމާއަތުން ވަނީ އެ ސިޓީގެ މައި ސިއްހީ ހިދުމަތްދޭ މަރުކަޒާ ދިމާލަށް ރޮކެޓް ޕްރޮޕެލްޑް ހަތަރު ގްރެނޭޑް ފޮނުވާލައިފަ އެވެ.
އެހީތެރިކަން ފޯރުކޮށްދިނުމުގެ މަސައްކަތުގައި ހަރަކާތްތެރިވާ އަލް-ފާޝަރުގެ ރެސިސްޓެންސް ކޮމެޓީން ބުނީ ސައުދީ ހޮސްޕިޓަލަށް އަމާޒުކޮށް ދިން ހަމަލާގެ ސަބަބުން ބޭސްފަރުވާގެ ހިދުމަތް މެދުކަނޑާލަން މަޖުބޫރުވެފައިވާ ކަމަށެވެ. އެއީ އެ ސިޓީގައި ބާކީ އޮތް އެންމެ ފަހު އޯޕަން ހޮސްޕިޓަލެވެ.
ސޫދާނުގެ އަސްކަރިއްޔާއާއި އާރްއެސްއެފް އިން ދަނީ މިމަހުގެ 10 ވަނަ ދުވަހުން ފެށިގެން އަލްފަޝޭރުގައި ހަނގުރާމަ ކުރަމުންނެވެ.
މި ސިޓީއަކީ އދ އާއި ބައިނަލްއަގްވާމީ އެހީދޭ އެހެނިހެން އިދާރާތަކުން ދާރުފޫރުގައި އިންސާނީ އެހީތެރިކަން ފޯރުކޮށްދޭ ހަބަކަށް ވެފައި ވެ އެވެ.
