ތައިލެންޑުގެ ފެސްޓިވަލެއްގައި އެއްވެ ތިބި މީހުންގެ ތެރޭގައި ބޮމެއް ގޮއްވާލައި ތިން މީހަކު މަރުވެ އެތައް ބަޔަކު ޒަހަމްވެއްޖެ އެވެ.

މި ހަމަލާ ދީފައިވަނީ ހުކުރު ދުވަހުގެ ރޭ ދަންވަރުގެ ވަގުތެއްގައި އުތުރު ޓަކް ޕްރޮވިންސްގެ އުމްފަންގް ޑިސްޓްރިކްޓްގައި ކޮންމެ އަހަރަކު ބާއްވަމުން އަންނަ ރެޑްކްރޮސް ޑޯއި ލޮއިފާ ފެއާގަ އެވެ.

ތައިލެންޑުގެ ފުލުހުންނާ ހަވާލާދީ އެސޯސިއޭޓެޑް ޕްރެސް އާއި އެގައުމުގެ މީޑިއާތަކުން ރިޕޯޓްކޮށްފައިވާ ގޮތުގައި ދެ މީހަކު ބަންދުގައި ބަހައްޓާފައި ވީ ނަމަވެސް އެއްވެސް ދައުވާއެއް އުފުލާފައެއް ނުވެ އެވެ.

މި ހާދިސާގައި 48 މީހުން ޒަޚަމްވެފައިވާއިރު އޭގެ ތެރެއިން ހަ މީހަކަށް ސީރިއަސް އަނިޔާތަކެއް ލިބިފައިވާ ކަމަށް ފުލުހުން ބުނެއެވެ.

މި ހާދިސާގެ މައުލޫމާތު ފުލުހުންނަށް ލިބިފައިވަނީ ހުކުރު ދުވަހުގެ ރޭ ރާއްޖެ ގަޑިން 23:30 ހާއިރު އެވެ.

އުމްފަންގް ރެސްކިއު ޓީމުން ނެރުނު ބަޔާނެއްގައި ބުނީ އެކްސްޕްލޯސިވްސް (ބޮން) އެއްލާލުމަށްފަހު ވެއްޓުނީ މީހުން ނަށަމުން ދިޔަ އައުޓްޑޯ ސްޓޭޖެއްގެ މައްޗަށެވެ.

އަދި ޒަހަމްވި ބައެއް މީހުން ކައިރި ހޮސްޕިޓަލަކަށް ގެންގޮސްފައިވާ ކަމަށް ވެސް އެ އިދާރާއިން ބުންޏެވެ.

ބައެއް ރިޕޯޓްތައް ބުނާ ގޮތުން ބޮން ގޮއްވާލީ އައިއީޑީއެއްގެ ސަބަބުންނެވެ.

ސޯޝަލް މީޑިއާގައި އާންމުކޮށްފައިވާ އެ ތަނުގެ ފުޓޭޖުތަކުން ފެންނަގޮތުގައި އިމަޖެންސީ ގައި މަސައްކަތްކުރާ މީހުންނާއި ފެސްޓިވަލްތަކަށް ދާ މީހުން ޒަހަމްވާ މީހުންނަށް ފަރުވާ ދެމުންދާ ބިރުވެރި މަންޒަރުތައް ފެނެއެވެ.