މީގެ އަހަރެއް ކުރިން ސަހްޔޫނީން ގާޒާއަށް ދެމުން ގެންދާ ހަމަލާތަކުގައި 2.5 މިލިއަން މީހުން ހާލުގައި ޖެހިފައި ވާއިރު މިހާތަނަށް ހަމަލާތަކުގައި ޝަހީދުވި މީހުންގެ އަދަދު އިއްޔެގެ ނިޔަލަށް ވަނީ 45،000 ހުރަސްކޮށްފަ އެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ.

ގާޒާއިން ހަމާސް ނައްތާލަން ކަމަށް ބުނެ ސަހްޔޫނީންގެ ދިފާއީ ބާރުތަކުން ދޭން ފެށި ހަމަލާތައް އަދިވެސް ދަނީ ކުރިއަށެވެ. ސަހްޔޫނީން މިހާރު އެންމެ ވަރުގަދަޔަށް ހަމަލާ ދެމުން ދަނީ ގާޒާގެ އުތުރަށެވެ. އަދި ސަހްޔޫނީންގެ ސިފައިން ގާޒާއަށް ދޭންފެށި ހަމަލާތަކާ ގުޅިގެން ގެދޮރު ދޫކޮށް ދިޔަ އުތުރު ގާޒާގެ އެއްވެސް މީހަކަށް، ދެން އަލުން އެ މީހުންގެ ވަޒަނަށް ދިއުމަށް ފުރުސަތު ނުދޭނެ ކަމަށް ސަހްޔޫނީންގެ ދިފާއީ ބާރުތަކުން ވަނީ ބުނެފަ އެވެ.

ގާޒާއިން ފައިބައިގެން ދިޔަ މީހުންގެ ތެރޭގައި ހަމާސްގެ ހަނގުރާމަވެރިން ތިބުމަކީ ވެސް އެކަށީގެންވާ ކަމެއް ކަމަށް ސަހްޔޫނީން ދެކެ އެވެ. ސަހްޔޫނީންގެ އަނިޔާވެރި ހަމަލާތަކުން ރައްކާތެރިވުމަށް އުތުރު ގާޒާ ދޫކޮށް ދިޔަ މީހުން އެބުރި ވަޒަނަށް ދިއުން މަނާކުރަނީ އެ މީހުންގެ ސަބަބުން ސަހްޔޫނީންނަށް އިތުރަށް ނުރައްކާވެދާނެތީ އެވެ.

ގާޒާއަށް ދެމުން އަންނަ ހަމަލާތައް ހުއްޓާލުމަށް ސަހްޔޫނީންނަށް ގިނަ ގައުމުތަކުން ގޮވާލައި، އެކަމާ ގުޅޭ އެއްބަސްވުމެއް ހެދުމަށް މަސައްކަތް ކުރި ނަމަވެސް، މިހާތަނަށް ސަހްޔޫނީން އެއްވެސް ގައުމަކަށް އިޖާބަ ދީފައެއް ނުވެ އެވެ. ސުލްހައިގެ ވާހަކަ އަށް ދެނީ ބީރު ކަންފަތެކެވެ.

މުޅި ގާޒާހެން ފުނޑުފުނޑު ކޮށްލާފައިވާ އިރު، ހާއްސަކޮށް އުތުރު ގާޒާ ސަހަރުގެ ރައްޔިތުން ވަނީ ގެދޮރު ގެއްލި ވަންނާނެ އިތުރު ތަނެއް ނެތި ގޮތްހުސްވެފަ އެވެ. ސަހްޔޫނީންގެ ހަމަލާތައް އާންމުން ދިރިއުޅޭ އިމާރާތްތަކާއި ހޮސްޕިޓަލްތަކަށާއި ސްކޫލްތަކަށާއި މިސްކިތްތަކަށް ވެސް ވަނީ އަމާޒުކޮށްފަ އެވެ.

އދ.އިން ބުނީ ގާޒާގެ އުތުރުގައި ތިބި ފަލަސްތީނުގެ އާންމުންގެ ހާލަތަކީ ކެތް ނުކުރެވޭނެ ހާލަތެއް ކަމަށާއި އެ ސަރަހައްދުގައި ހަނގުރާމަ ކުރިއަށް ގެންދަނީ ބައިނަލްއަގްވާމީ އިންސާނީ ގާނޫނުގެ ޝަރުތުތަކަށް މާބޮޑު ފަރުވާލެއް ނުބަހައްޓާ ކަމަށެވެ.

ކާބޯތަކެއްޗާއި ބޭހާއި، ކޮންމެހެން ބޭނުންވާ ސާމާނު ފޯރުކޮށްދިނުމަށް ކުރާ މަސައްކަތަށް ސަހްޔޫނީންގެ ކަމާބެހޭ ފަރާތްތަކުން ހުރަސް އަޅަމުންދާތީ، މީހުންގެ ފުރާނަ ނުރައްކަލަށް ހުށަހެޅިފައިވާ ކަމަށް ވެސް އދ.އިން ބުނެ އެވެ.