ޕާކިސްތާނުގެ އަސްކަރިއްޔާއިން ބޮން އަޅައި އަފްޣާނިސްތާނުގެ އިރުމަތީ ސަރަހައްދަށް ދިން ވައިގެ ހަމަލާތަކުގައި 46 މީހުން މަރުވެއްޖެ އެވެ.

އަފްޣާނިސްތާނުގައި ވެރިކަން ކުރާ ތާލިބާން ޖަމާއަތުގެ ދިފާއީ އިދާރާއިން ނެރުނު ބަޔާނެއްގައި ބުނީ ޕާކިސްތާނުގެ އަސްކަރިއްޔާއިން ދިން ހަމަލާތައް އަމާޒުވެފައި ވަނީ އާންމުންނަށް ކަމަށެވެ.

އަދި އެ ހަމަލާތަކުގައި އަންހެނުންނާއި ކުޑަކުދިން މަރުވި ކަމަށާއި އެ ސަރަޙައްދަކީ ވަޒިރިސްތާނުން ގެދޮރު ގެއްލުނު މީހުން ދިރިއުޅެމުންދާ ސަރަޙައްދެއް ކަމަށް ވެސް އެ ބަޔާނުގައި ބުނެފައިވެ އެވެ.

ތާލިބާނުންގެ ބަޔާނުގައި ޕާކިސްތާނުގެ އަސްކަރިއްޔާއިން ދިން ޙަމަލާ ސިފަކޮށްފައި ވަނީ އަފްޣާނިސްތާނުގެ ސިޔާދަތަށާއި މިނިވަން ކަމަށް ދިން ހަމަލާއެއްގެ ގޮތުގައެވެ. އަދި އެ ފަދަ އުދުވާންތައް ހިންގައިގެން ޕާކިސްތާނަށް ހާސިލްކުރެވޭނެ ކަމެއް ނެތް ކަމަށް އެ ބަޔާނުގައި ފާހަގަކޮށްފައިވެ އެވެ. އަފްޣާނިސްތާން ދިފާއު ކުރުމަކީ ތާލިބާނުންގެ ވާޖިބެއް ކަމަށް ބުނެ އެ ޙަމަލާތަކުގެ ބަދަލުހިފާނެ ކަމުގެ އިންޒާރު ވެސް އެ ޖަމާއަތުން ވަނީ ދީފަ އެވެ.

ތާލިބާނުން 2021 ވަނަ އަހަރު އަފްޣާނިސްތާނުގެ ވެރިކަން އަލުން ހޯދި ފަހުން ދެ ގައުމުގެ ބޯޑަރު ގައި ނުތަނަވަސްކަން ބޮޑުވެފައި ވާއިރު މިއީ އެ ސަރަހައްދުގައި މި ފަހުން ދިން އެންމެ ނުރައްކާތެރި ހަމަލާ އެވެ.

އަފްޣާނިސްތާނުގެ ބޯޑަރު ސަރަހައްދުތަކުގައި ޕާކިސްތާނުގެ އަސްކަރިއްޔާއިން މިދިޔަ މާޗު މަހު ދިން ނުރައްކާތެރި ވައިގެ ހަމަލާތަކެއްގައި ވެސް އާންމުންގެ އަށް މީހަކު މަރުވެފައިވާ ކަމަށް ތާލިބާނުން ބުނެ އެވެ.