ގާޒާ ހުރަސްކޮށް ސަހްޔޫނީން ދޭ ވައިގެ ހަމަލާތަކުގައި 30 މީހުން މަރުވެ ދިހަވަރަކަށް މީހުން ހުކުރު ދުވަހުގެ ހެނދުނުން ފެށިގެން ހޯމަ ދުވަހުގެ ނިޔަލާއި ޒަހަމްވެއްޖެ އެވެ.

ގާޒާގެ އަލް ދަރާޖް ނަމަކަށް ކިޔާ ސަރަހައްދުގައި ހުންނަ އަލް އޮމާރީ މިސްކިތް ކައިރީގައި ހުންނަ ގެއަކަށް ސަހްޔޫނީން ދިން ވައިގެ ހަމަލާއެއްގައި ހޯމަ ދުވަހުގެ ހެނދުނުގެ ވަގުތެއްގައި އަންހެނަކާއި ކުޑަކުއްޖަކު މަރުވެއްޖެއެވެ. މީގެ އިތުރުން ޣައްޒާގެ އުތުރުގެ ހިސާބެއްކަމަށްވާ ޝެއިޚް ރަދުވާންގައި ގެއަކަށް އިތުރު ވައިގެ ހަމަލާއެއްދީ ހަތަރު މީހަކު މަރުވެ އެތައް ބަޔަކު ޒަޚަމްވިކަމަށް ފަލަސްތީނުގެ މީޑިއާތަކުން ރިޕޯޓުކޮށްފައިވެ އެވެ. އަދި ހޯމަ ދުވަހުގެ ހެނދުނު މަސްބާހް ސަރަހައްދުގައި ހިނގި އެހެން ހާދިސާއެއްގައި ވެސް ޑްރޯން ހަމަލާއެއްގައި ދެ ދަނޑުވެރިން މަރުވެފައިވެ އެވެ.

ރަފަހުގެ އުތުރުން އޮންނަ ކޯފް މެރާޖް ކައިރީގައި ސަހްޔޫނީން ދިން ވައިގެ ހަމަލާއެއްގައި އިތުރު ދެ މީހަކު މަރުވެފައިވާ ކަމަށްވެސް ރިޕޯޓްތަކުގައި ބުނެފައިވެ އެވެ.

އެއާއިއެކު ހުކުރު ދުވަހުގެ ހަވީރު ވަނީ ޣައްޒާގެ އަލް އަގްސާ ހޮސްޕިޓަލުގެ ވޮލަންޓިއަރެއް ކަމަށްވާ ޑރ ތަބަތު ސަލީމް ޝަހީދުވިކަން އިއުލާންކޮށްފަ އެވެ.