

ޣައްޒާގައި ކްރޭނެއް ވެއްޓި ސަހްޔޫނީ 2 ސިފައިން މަރުވެއްޖެއެވެ.
ސަހްޔޫނީން ބުރާސްފަތި ދުވަހު ރިޕޯޓްކޮށްފައިވާ ގޮތުގައި ރޭ ޣައްޒާގެ އުތުރުގައި ބާރު ވައިރޯޅިއެއް ޖެހިގެން ކްރޭނެއް ވެއްޓި ސަހްޔޫނީ 2 ސިފައިންގެ ފުރާނަ ގެއްލި 8 މީހަކަށް އަނިޔާވިކަމަށް ރިޕޯޓުކޮށްފައިވެއެވެ.
މި ހާދިސާއަށް ފަހު އެ އޮންކްލޭވްގެ އުތުރު ސަރަހައްދުގައި ހުރި ހުރިހާ ކްރޭންތަކެއް ރޫޅާލަން ނިންމައިފައިވާކަމަށް ސިފައިންގެ ރޭޑިއޯއިން ފޯރުކޮށްދިން މެސެޖެއްގައިވަނީ ބުނެފައެވެ. އަދި އެއީ މޫސުން ގޯސްވުމުގެ ސަބަބުންކަމަށް އެ މެސެޖުގައިވެއެވެ.
ވެއްޓުނު ސިފައިންގެ ތެރެއިން އެކަކީ ގޯލާނީ ބްރިގޭޑްގެ 51 ވަނަ ބެޓޭލިއަންގައި ޚިދުމަތް ކުރެއްވި ފަސްޓް ކްލާސް ނަދާވް ކޯހެންކަމަށެވެ. ނަމަވެސް ސަހްޔޫނީން ދެވަނަ ސިފައިންގެ މީހާގެ އައިޑެންޓިޓީ ފަހުން ހާމަކުރާނެކަމަށް ބުނެފައިވާކަން ފާހަގަކޮށްލެވެއެވެ.