ސަހްޔޫނީން ޣައްޒާގެ އޮންކްލޭވް ދެބައިވާ ހިސާބު ކަމަށްވާ ނެޓްޒާރިމް ކޯރިޑޯގެ ނަމުން މަޝްހޫރު ސަރަހައްދުން ފައިބައިފިކަން ހަމާސް އިން އާދީއްތަ ދުވަހު ހާމަކޮށްފިއެވެ.

މިކަން ސަހްޔޫނީންވެސް ވަނީ ކަށަވަރުކޮށްދީފައިކަން ފާހަގަކޮށްލެވެއެވެ.

އެ ސަރަހައްދުން ސަހްޔޫނީން ފޭބުންވަނީ ކާމިޔާބީއެއްގެ ގޮތުގައި ފާހަގަކޮށް، އަނބުރާ ގެތަކަށް ދިއުމަށް ހުރަސްކުރާ ފަލަސްތީނުގެ ރައްޔިތުންނަށް އެހީވުމުގެ ގޮތުން ފްލޯ މެނޭޖްކުރުމަށް ހަމާސް އިން ހިންގާ ފުލުހުން އެ ސަރަހައްދުގައި ހަރަކާތްތެރިވާންވެސްވަނީ ފަށާފައެވެ.

ރޮއިޓާސްގެ ފޫޓޭޖުން ފެންނަ ގޮތުގައި ސަހްޔޫނީ އަސްކަރީ އުޅަނދުތަކެއް ކަމަށް ފެންނަ އެއްޗެހި އައްސޭރިފަށުން ދުރަށް ދާ ތަން ފެނެއެވެ.

ހަނގުރާމައިގެ ފުރަތަމަ މަސްތަކުން ފެށިގެން ސަހްޔޫނީން ވަނީ އިސްރާއީލުގެ ބޯޑަރުން ފެށިގެން މެޑިޓެރޭނިއަން ކަނޑާ ހަމައަށް އޮންނަ ޣައްޒާ ސިޓީގެ ދެކުނުގައި އޮންނަ ގާތްގަނޑަކަށް 4 މޭލު ދިގު ކޮރިޑޯ ހިފާފައެވެ.

ފާއިތުވި ހަފްތާތަކުގައި ހަނގުރާމައިގެ ހިޔާވަހިކަމުގައި ފަލަސްތީނުގެ އެތައް ހާސް ބަޔަކު ވަނީ ދެކުނު ޣައްޒާއިން އުތުރުގައި ތިބި އެމީހުންގެ ގެތަކަށް އެނބުރި ގޮސްފައެވެ.

އެ ސަރަހައްދު ހުރަސްކުރި ބައެއް މީހުން ވަނީ ސަހްޔޫނީ ސިފައިން އަނބުރާ ދިޔަ ސަރަހައްދުތަކުން އިންފްރާސްޓްރަކްޗަރ ހަލާކުވެ، އިންސާނުންގެ ހަށިގަނޑު ކަމަށް ބެލެވޭ އެއްޗެހި ފެންނަކަމަށްވެސް ރިޕޯޓުތަކުގައި ވެއެވެ.

ސަހްޔޫނީން ހިންގި ނަސްލު ނައްތާލުމުގެ ކެމްޕޭނަށް ފަހު ޣައްޒާގެ އުތުރުގެ ބޮޑު ބައެއް ވަނީ ފަޅު ބިމަކަށް ވެފައެވެ. ގެދޮރު ހަލާކުވެފައި ހުރިތަން ފެނުމުން ޣައްޒާގެ ބައެއް މީހުން އެނބުރި ދެކުނަށް ގޮސްފައިވާއިރު، އަނެއް ބަޔަކު ވަނީ ކުރިން ގެދޮރު ހުރި ތަނުގައި ޓެންޓް ޖަހާފައެވެ.

15 މަހަށް ވުރެ ގިނަ ދުވަހުގެ ހަނގުރާމައަށް ފަހު ޖެނުއަރީ 19 ވަނަ ދުވަހު އަމަލުކުރި ހަނގުރާމަ ހުއްޓާލުމުގެ އެއްބަސްވުމާ ގުޅިގެން ފާއިތުވި ހަފްތާތަކުގައި އަމިއްލަ ކޮންޓްރެކްޓަރުންގެ ގޮތުގައި ވަޒީފާ އަދާކުރާ އެމެރިކާގެ ކުރީގެ ސިފައިން ވަނީ ކޯރިޑޯއިން އުޅަނދުތައް ބަލާ ފާސްކޮށްފައެވެ.