ސަހްޔޫނީންގެ ހަމަލާތަކުގައި ފަލަސްތީނުގެ ފަސް މީހަކު ޝަހީދުވެއްޖެއެވެ.
މީގެ ތެރޭގައި ހިމެނެނީ ޣައްޒާއަށް ދިން ޑްރޯން ހަމަލާއެއްގައި ޝަހީދުވި ހަތަރު މީހަކާ ސަހްޔޫނީ ނޭވީ ކަނޑުމަތީގައި ޝަހީދުކޮށްލި މީހެކެވެ.
މީގެ އިތުރުން ޣައްޒާގެ ދެކުނުގެ ރަފަހުގައި ވެސް ޓޭންކާއި ބަޑިޖެހުމުގެ ކަންކަން ކުރިއަށް ގެންދާކަމަށް ރިޕޯޓް ކޮށްފައިވެއެވެ.
ހަމަލާތައް މެދު ކެނޑުމެއް ނެތި އަލުން ދޭން ފަށާފައިވަނީ ހަނގުރާމަ ހުއްޓާލުމުގެ މަސައްކަތް ކުރިއަށް ގެންދާނެ ގޮތަކާ މެދު ހަމާސް އާއި އެމެރިކާ އާއި ސަހްޔޫނީންނާއި ދެމެދު މަޝްވަރާތައް ކުރިއަށްދާ ދަނޑިވަޅެއްގައެވެ.
ސަހްޔޫނީން ޣައްޒާއަށް ހަމާސްއާ އެކު ހަނގުރާމަ ހުއްޓާލުމުގެ އެއްބަސްވުމުގައި ސޮއިކުރި ނަމަވެސް، ސަހްޔޫނީން ޣައްޒާއަށް ދިން ހަމަލާތައް ވަނީ ކުރިއަށް ގެންގޮސްފައެވެ.
ޖެނުއަރީ މަހު ހަނގުރާމަ ހުއްޓާލުމުގެ މަސައްކަތް ފެށުނު ފަހުން ސަހްޔޫނީން ޣައްޒާއަށް ދިން ހަމަލާތަކުގައި ފަލަސްތީނުގެ 98 މީހަކު ވަނީ ޝަހީދުވެފައެވެ.
