ސަހްޔޫނީ ސިފައިން ޣައްޒާގައި ހުރި ހަމައެކަނި ކެންސަރަށް ހާއްސަ ހޮސްޕިޓަލް ފުނޑު ފުނޑު ކޮށްލައިފިއެވެ.

ޣައްޒާ ދެ ބަޔަކަށް ބަހާލައިގެން ސަހްޔޫނީންގެ ކޮންޓްރޯލްގެ ދަށުގައި އޮތް ސަރަހައްދެއް ކަމަށްވާ ނެޓްޒާރިމް ކޮރިޑޯގައި ހުންނަ މި ހޮސްޕިޓަލަށް ހަމަލާއެއް އަމާޒުކޮށްފައި ވަނީ މި ހަފްތާގެ ކުރީކޮޅު ސަހްޔޫނީން އެ ކޮރިޑޯގައި އަލުން އޮޕަރޭޝަންތައް ފެށުމާއި ގުޅިގެންނެވެ.

ސަހްޔޫނީ އަސްކަރިއްޔާއިން ބުނީ ތުރުކީ-ފަލަސްތީނުގެ ފްރެންޑްޝިޕް ހޮސްޕިޓަލަށް ޑޮކްޓަރުންނާއި ބަލިމީހުންނަށް ނުވަދެވޭ ކަމާއި އެތަނުގައި އޮޕަރޭޓްކުރަނީ ހަމާސް ހަނގުރާމަވެރިންކަމަށް ތުހުމަތު ކޮށެވެ. ނަމަވެސް އެ ހޮސްޕިޓަލް ގާއިމް ކުރުމަށް އެހީތެރިވި ތުރުކިޔޭ އިން ވަނީ ސަހްޔޫނީން އެ ހޮސްޕިޓަލް އަސްކަރީ މަރުކަޒެއްގެ ގޮތުގައި ބޭނުންކުރި ކަމަށް އޭޕީގެ ރިޕޯޓެއްގައި ތުހުމަތުކޮށްފައެވެ.

ތުރުކީގެ ފޮރިން މިނިސްޓްރީން ވަނީ އެ ހޮސްޕިޓަލް ހަލާކުކޮށްލި މައްސަލަ ކުށްވެރިކޮށް، ސަހްޔޫނީން ގަސްދުގައި ޣައްޒާ އަށް މީހުން ދިރިއުޅެވޭނެ ގޮތް ނައްތާލައި ފަލަސްތީނުގެ ރައްޔިތުން ގަދަކަމުން އެ ސަރަހައްދުން ފޮނުވާލުމުގެ ނިޔަތުގައިކަމަށް ތުހުމަތުކޮށްފައެވެ.

ޣައްޒާގެ 18 މަސްދުވަހުގެ ނަސްލު ނައްތާލުމުގެ ސަބަބުން ރަސްމީކޮށް 61،700 މީހުން ޝަހީދުވި ކަމަށް ޣައްޒާގެ މީޑިއާ އޮފީހުން ބުނެފައިވާއިރު، މުޅި ސަރަހައްދު ވަނީ ބިމާއި ހަމަހަމަވެފައެވެ.

ސަހްޔޫނީންގެ ޑިފެންސް މިނިސްޓަރު އިސްރާއީލް ކަޓްޒް ވިދާޅުވީ އަންގާރަ ދުވަހާއި ބުދަ ދުވަހު ދިން ވައިގެ ހަމަލާތަކަކީ ފެށުމެއް ކަމަށާއި ޣައްޒާ ފުނޑު ފުނޑުކޮށްލާނެކަމަށް ބުނެފައިވެއެވެ.

ފާއިތުވި ދެ މަސް ދުވަހުގެ ތެރޭގައި ފަލަސްތީނުގެ ގިނަ އަދަދެއްގެ މީހުން އެނބުރި އެމީހުންގެ ގެދޮރާއި އަވަށްތަކަށް އެނބުރި އައިސް މިހާރު ގަދަކަމުން ގެދޮރު ދޫކޮށްލުމަށް މަޖުބޫރު ކުރަމުންދާކަމަށް މަސްދަރުތަކުން ރިޕޯޓު ކުރެއެވެ.