ރަފަހު ސަރަހައްދު / އަނަޑޮލު އަޖަންސި
ދުނިޔެ
ސަހްޔޫނީ ސިފައިން ޣައްޒާގެ ދެކުނުގެ ރަފަހަށް ވަދެ އަސްކަރީ ކެމްޕޭން ފުޅާ ކުރަން ފަށައިފި
Hussain Nawaf
ހުސައިން ނަވާފް
02 އޭޕްރީލު 2025

ސަހްޔޫނީ ސިފައިން ޣައްޒާގެ ދެކުނުގެ ރަފަހަށް ވަދެ އަސްކަރީ ކެމްޕޭން ފުޅާ ކުރަން ފަށައިފިއެވެ.

ސަހްޔޫނީންގެ ދައުލަތުގެ ބްރޯޑްކާސްޓާ ކޭއެން އިން ބުނާ ގޮތުގައި ގްރައުންޑް އޮފެންސިވްގައި ސަހްޔޫނީ ސިފައިންގެ 36 ވަނަ ޑިވިޝަން ބައިވެރިވާއިރު، މިއީ 18 މާޗްގައި ޣައްޒާގައި ފަލަސްތީނުންނާ ދެކޮޅަށް އަސްކަރިއްޔާއިން ނަސްލު ނައްތާލުމުގެ ހަމަލާ އަލުން ފެށި ފަހުން ދިން އެންމެ ބޮޑު ހަމަލާ އެވެ.

ބުދަ ދުވަހުގެ ހަމަލާގެ ކުރިން ވަނީ ރަފާހާއި ޚާން ޔޫނިސްއާ ދެމެދުގެ ބޮޑެތި ސަރަހައްދުތަކުން ފަލަސްތީނުގެ ރައްޔިތުން ނެރުމަށް އަމުރު ކުރަމުންނެވެ.

18 މާޗްގެ ފަހުން ފަލަސްތީނުގެ 1،000 އަށް ވުރެ ގިނަ މީހުން މަރުވެ 2،000 އަށް ވުރެ ގިނަ މީހުން ސަހްޔޫނީ ހަަމަލާތަކުގައި ޒަހަމްވިކަން ފާހަގަ ކުރެވެއެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން ސަހްޔޫނީން ހިނގި ނަސްލު ނައްތާލުމުގެ އޮޕަރޭޝަންތަކުގައި ޣައްޒާގެ 50،400 މީހުން ޝަހީދު ކޮށްލައިފައިވާ އިރު އޭގެ ތެރެއިން ގިނައީ އަންހެނުންނާއި ކުޑަކުދިންނެވެ.

އިންޓަނޭޝަނަލް ކްރިމިނަލް ކޯޓުން މިދިޔަ ނޮވެމްބަރު މަހު ވަނީ ސަހްޔޫނީންގެ ބޮޑުވަޒީރު ބެންޖަމިން ނަތަންޔާހޫ އާއި އޭނާގެ ކުރީގެ ޑިފެންސް މިނިސްޓަރު ޔޯއަވް ގަލަންޓް ހައްޔަރު ކުރުމުގެ އަމުރު ނެރެފަ އެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved