ޣައްޒާގައި ހުރި ފެން ބަހާ ޕޮއިންޓަކަށް ސަހްޔޫނީންއިން އާދީއްތަ ދުވަހު ދިން ވައިގެ ޙަމަލާއެއްގައި ޣައްޒާގެ 6 ކުޑަކުދިންނާއެކު 10 މީހުން ޝަހީދުކޮށް އިތުރު 12 މީހުންނަށް ވަނީ އަނިޔާވެފައެވެ.
މި ޙަމަލާ އަކީ ފަލަސްތީނު އިސްލާމިކް ޖިހާދުގެ މެންބަރަކަށް އަމާޒުކޮށް ދިން ހަމަލާއެއްގައި ޓެކްނިކަލް މައްސަލައެއް ދިމާވުމުގެ ސަބަބުން ކުރިމަތިވެފައި ވާ ހަމަލާއެއް ކަމުގައި ސަހްޔޫނީންގެ މިލިޓަރީން ބުނެފައިވެއެވެ.
2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް ސަހްޔޫނީންގެ ހަމަލާތަކުގައި ފަލަސްޠީނުގެ 58،000 އަށް ވުރެ ގިނަ މީހުން ޝަހީދުވެފައި ވާ ކަމުގައި ޣައްޒާގެ ސިއްހީ ވުޒާރާއިން ބުނެފައިވެއެވެ.
ސަހްޔޫނީންގެ މިލިޓަރީން ނެރުނު ބަޔާނެއްގައި ބުނެފައިވަނީ އެހަމަލާ އަމާޒުވކުރި ދިމާނޫން އެހެން ދިމާލަކަށް ވެއްޓުމާއި ގުޅިގެން ރައްޔިތުންނަށް ލިބުނު ގެއްލުމަށް ހިތާމަކުރާ ކަމުގައެވެ.
ފާއިތުވި ހަފްތާތަކުގައި މި ހަމަލާ ތަކުގައި ޝަހީދުވާ މީހުންގެ އަދަދު ވަނީ ދުވާލެއްގެ މައްޗަށް 100 އަށް ވުރެ އިތުރުވެފައެވެ. މިއީ ކާބޯތަކެއްޗާއި އަސާސީ ޚިދުމަތްތައް ފޯރުކޮށްދިނުމުގެ ނިޒާމު ވީރާނާވެފައިވާ ސަރަހައްދެއްގައި ފެންނަ ނުރައްކާތެރި އަދަދެކެވެ.
ބައިނަލްއަޤްވާމީ ޖަމާޢަތްތަކުން ވަނީ ޣައްޒާގައި ދިރިއުޅެން އުނދަގޫވާ ހިސާބަށް ކަންތައްތައް ގޮސްފައިވާކަމަށް ތަކުރާރުކޮށް އިންޒާރުދީފައެވެ.
