49 ފަސިންޖަރުންނާއި އެކު ދަތުރުކުރަމުން ދިޔަ ރަޝިޔާގެ މަތިންދާބޯޓެއް ވެއްޓެ އެންމެން މަރުވެފައިވާ ކަމަށް ބެލެވިފައިވާ ކަމަށް ރިޕޯޓްކޮށްފިއެވެ.

އަންތޯނޮފް އޭއެން-24 މަރުކާގެ މި މަތިންދާބޯޓު ވެއްޓުނު ހާދިސާގައި ބޯޓުގައި ތިބި އެންމެން މަރުވެފައިވާ ކަމަށް ބެލެވިފައިވީނަމަވެސް އެއްވެސް ރަސްމީ އިދާރާއަކުން މިކަން އަދި ކަށަވަރުކޮށްދީފައި ނުވެއެވެ.

ރަޝިއާގެ އިމަޖެންސީ ސިޗުއޭޝަންސް މިނިސްޓްރީން ރިޕޯޓްކޮށްފައިވާ ގޮތުގައި އެމްއައި-8 ރެސްކިއު ހެލިކޮޕްޓަރަކުން ވަނީ ޓައިންޑާގެ ދެކުނުން ގާތްގަނޑަކަށް 15-16 ކިލޯމީޓަރު ދުރުގައި އޮންނަ ފަރުބަދައެއްގައި މަތިންދާބޯޓުގެ ބައިތައް އަނދަމުން ދިޔަ ތަން ފެނިފައިވެއެވެ.

އިންވެސްޓިގޭޓަރުން އާންމުކުރި ވީޑިއޯ ފުޓޭޖްތަކުން ފެންނަ ގޮތުގައި ބޮޑު ޖަންގަލީގެ ތެރެއިން ދުން އަރަމުންދާއިރު، ބޯޓު ވެއްޓުނު ސަރަހައްދުގައި ކުނިތައް ފެތުރިފައި ވެ އެވެ.

އޮފިޝަލުން ވިދާޅުވީ ހެލިކޮޕްޓަރުގައި ތިބި މީހުން ސަލާމަތްކުރާ މީހުންނަށް އެއްވެސް ފަސިންޖަރެއްގެ ނިޝާނެއް ފެނިފައި ނުވާ ކަމަށާއި، އެ ސަރަހައްދު ހާލަތު ގޯސްވުމުގެ ސަބަބުން ގްރައުންޑް ޓީމްތަކަށް ވަނުމަށް ހުރަސް އެޅިފައިވާ ކަމަށެވެ.