އިންޑިއާގެ ނިކޮބާ އައިލެންޑްސް ކައިރިއަށް 6.6 މެގްނިޓިއުޑްގެ ބާރުމިނުގައި ބިންހެލުމެއް ރޭ ރިކޯޑްކުރެވިފައިވާ ކަމަށް ރިޕޯޓްކޮށްފިއެވެ.
މި ބިންހެލުން އައީ ރާއްޖެ ގަޑިން 23:41 ގައި ކަމަށާއި މި ބިންހެލުމާ ގުޅިގެން ރާއްޖޭގެ ބައެއް ސަރަހައްދުތަކަށް ލޮޅުމުގެ އަސަރުކޮށްފައިވާ ކަމަށް މޯލްޑިވްސް މީޓިއަރޮލޮޖިކަލް ސެންޓަރުން ހާމަކޮށްފައިވެއެވެ.
މީގެކުރިން ވެސް ނިކޮބާ އައިލެންޑްސް ކައިރިއަށް ދޭތެރެ ދޭތެރެއިން ކުދި ބިންހެލުންތައް އަންނަކަން ފާހަގަކުރެވެއެވެ.
އިންޑިއަން ސުނާމީ އާލީ ވޯނިން ސެންޓަރު (އައިޓީއީޑަބްލިއުސީ) އިން ބުނީ 6.6 މެގްނިޓިއުޑްގެ ބާރުމިނުގައި މި ބިންހެލުން އައީ 43 ކިލޯމީޓަރު އަޑިން ކަމަށެވެ. މި ބިންހެލުމުގެ ސަބަބުން ސުނާމީއެއް އަރާފާނެ ކަމަކަށް ނުބެލެވޭ ކަމަށް އެ ތަނުން ބުންޏެވެ.
އެމެރިކާގެ ޖިއޯލޮޖިކަލް ސާވޭ (ޔޫއެސްޖީއެސް) އިން ބުނީ އިންޑޮނޭޝިއާގެ ސަބަންގުއާ 258 ކިލޯމީޓަރު ދުރުން 6.5 މެގްނިޓިއުޑްގެ ބިންހެލުމެއް އައި ކަމަށް ރިކޯޑު ކުރެވިފައިވާ ކަމަށެވެ.
މި ބިންހެލުމާ ގުޅިގެން އިންޑިއާއަށް އެއްވެސް ގެއްލުމެއް ލިބުނު ކަމުގެ ރިޕޯޓެއް ނެތެވެ.
