ސެޕްޓެމްބަރު މަހު އދ.ގެ އާންމު މަޖިލީހުގައި ފަލަސްތީނުގެ ދައުލަތް ބަލައިގަތުމުގެ ވިސްނުން ގެންގުޅޭ ކަމަށް ކެނެޑާގެ ބޮޑުވަޒީރު މާކް ކާނީ ވިދާޅުވެއްޖެ އެވެ.
ކާނީ ވިދާޅުވީ މިއީ ފަލަސްތީނާއި ސަހްޔޫނީންގެ މައްސަލައަށް އޮތް ދާއިމީ ހައްލަކީ ދެ ދައުލަތް އުފެއްދުން ކަމަށް ކެނެޑާއިން ޒަމާނުންސުރެ ގަބޫލުކުރާއިރު އެކަން ކުރުމަށް އޮތް އުންމީދު "ލޯ ކުރިމަތީގައި ފަނޑުވަމުންދާތީ" ކޮންމެހެން އަޅަންޖެހުނު ފިޔަވަޅެއް ކަމަށެވެ.
ކެނެޑާގެ މި ނިންމުމަކީ ސިޔާސަތަށް ގެނައި ކުއްލި ބަދަލެއްގެ ގޮތުގައި ބެލެވިފައި ވާއިރު މި ނިންމުމަށް ސަހްޔޫނީން ވަނީ ވަގުތުން ދެކޮޅުހަދައި ފާޑު ކިޔައިފަ އެވެ.
ސެޕްޓެމްބަރު 2025 ގައި ބާއްވާ އދ.ގެ 80 ވަނަ އާންމު މަޖިލީހުގައި ކެނެޑާއިން ފަލަސްތީނުގެ ދައުލަތް ބަލައިގަތުމަށް ގަސްތުކުރަން
ބޮޑު ވަޒީރު ވިދާޅުވިއެވެ.
ކެނެޑާ އަކީ ސެޕްޓެމްބަރު މަހު ފަލަސްތީނުގެ ދައުލަތް ބަލައިގަންނާނެ ކަމަށް އިއުލާނުކުރި ތިން ވަނަ ގައުމެވެ.
ބައިނަލްއަގުވާމީ މައިދާނުގައި ނުފޫޒު ގަދަ ގައުމުތަކުގެ ތެރެއިން ފްރާންސާއި އިނގިރޭސި ވިލާތުން މީގެ ކުރިން ވަނީ މިކަން އިއުލާނުކޮށްފަ އެވެ.
