ފަލަސްތީނުގެ ގައުމީ ބާސްކެޓްބޯޅަ ކުޅުންތެރިޔާ މުހައްމަދު ޝަލާން ޚާން އަށް ސަހްޔޫނީން ބަޑި ޖަހާ ޝަހީދުކޮށްފިއެވެ.

މިގޮތުން ޚާން ޔޫނިސްގައި އެހީ ފޯރުކޮށްދޭ ސައިޓެއްގައި ޝަލާން ހަރކާތްތެރިވަމުން ދަނިކޮށް ސަހްޔޫނީންގެ ސިފައިން ވަނީ ޝަލާން ގަޔަށް ބަޑި ޖަހާފައިވާ ކަމަށް ރިޕޯޓްތަކުން ބުނެފައިވެއެވެ.

ފަލަސްތީނަށް ބައިނަލްއަގްވާމީ ޖަމިއްޔާތަކުން އެހީ ފޯރުކޮށްދޭ ސައިޓްތަކާއި ދިމާކޮށް ސަހްޔޫނީން ހަމަލާތައް މި ފަހުން އަމާޒުކުރަމުން އަންނަކަން ފާހަގަކުރެވެއެވެ.

މީގެއިތުރުން، ޣައްޒާ ސިޓީގެ ރައްޔިތުން ވަނީ ސަހްޔޫނީނުން އެ ގައުމުގެ އާބާދީ ބޮޑު ސަރަހައްދުތަކަށް ވައިގެ ހަމަލާތައް ދެމުންދާކަން ކަށަވަރުކޮށްދީފައެވެ.

ސަހްޔޫނީންގެ ބޭނުމަކި ފަލަސްތީނުގައި ބާކީ ހުރި ހުރިހާ އިމާރާތެއް ހަލާކުކޮށް މުޅި ޣައްޒާއެއްކޮށް ފަޅުކޮށްލުން ކަމަށް ފަލަސްތީނުގެ ރައްޔިތުން އަންނަނީ ބުނަމުންނެވެ.

މިއާއި އެކު ސަހްޔޫނީންގެ ހަމަލާއެއްގައި އަލްޖަޒީރާގެ 05 ނޫސްވެރިންވެސް މި ފަހުން ސަހްޔޫނީން ވަނީ ހަމަލާދީ މަރާލާފައެވެ.

ނިރުބަވެރި ސަހްޔޫނީ ސަރުކާރުން 2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން ދޭން ފެށި ލާއިންސާނީ ހަމަލާތަކުގައި ޝަހީދުވި ފަލަސްތީނު މީހުންގެ ޖުމްލަ އަދަދު 62،064 އަށް ވަނީ އަރާފައެވެ. އަދި އެކި ވަރުވަރުގެ ޒަހަމްތައް ލިބިގެން، 156،573 މީހުންނަށް ވަނީ ފަރުވާ ދީފައެވެ.