ސޮނީ އިންޓަރެކްޓިވް އެންޓަޓެއިންމަންޓުން އަންގާރަ ދުވަހު ބުނީ ޕްލޭސްޓޭޝަން ޔުނިޓުގެ ގާތްގަނޑަކަށް 900 މުވައްޒަފުން ނުވަތަ ގްލޯބަލް ވޯކްފޯސްގެ %8 ވަޒީފާއިން ވަކިކުރާނެ ކަމަށެވެ.
"އެތައް މަސްތަކެއް ވަންދެން ފަރުވާތެރިކަމާއެކު ވިސްނުމާއި ލީޑަޝިޕްގެ ގިނަ މަޝްވަރާތަކަށް ފަހު، ވިޔަފާރި ކުރިއަރުވައި ކުންފުނި ތަރައްގީ ކުރުމަށް ބަދަލުތަކެއް ގެންނަން ޖެހޭކަން ސާފުވެއްޖެ" ޔުނިޓްގެ ރައީސް އަދި ސީއީއޯ ޖިމް ރަޔަން މުވައްޒަފުންނަށް ފޮނުވި އީމެއިލްގައި ވިދާޅުވި އެވެ.
އޭނާ އިތުރަށް ވިދާޅުވީ ކުންފުނީގެ ހުރިހާ ސަރަހައްދެއްގެ މުވައްޒަފުންނަށް ވަޒީފާއިން ވަކިކުރުމުގެ އަސަރު ކުރާނެ ކަމަށެވެ. ޕްލޭސްޓޭޝަންގެ ލަންޑަން ސްޓޫޑިއޯ މުޅިން ބަންދުކުރާއިރު، އިތުރު ބައެއް ސްޓޫޑިއޯތަކަށް ވެސް އެކަމުގެ އަސަރު ކުރާނެ އެވެ.
ޖަޕާނުގެ ގޭމިން ޖަޔަންޓް ކުންފުނިން ވަނީ ޑިމާންޑް ދަށްވާނެ ކަމުގެ އިންޒާރު ދިނުމުން ފެބްރުއަރީ 14 ވަނަ ދުވަހު އެ ކުންފުނީގެ ފްލެގްޝިޕް ޕްލޭސްޓޭޝަން 5 ކޮންސޯލްގެ ވިކޭނެ ކަމަށް އަންދާޒާ ކުރާ މިންވަރު ދަށްކޮށްފަ އެވެ. ސޮނީން އޭރު ބުނީ މާޗް މަހު ނިމޭ މާލީ އަހަރު ޕީއެސް5 ގެ 21 މިލިއަން ޔުނިޓް ވިއްކާނެ ކަމަށް ލަފާކުރެވޭ ކަމަށާއި އެއީ ކުރިން ލަފާކުރި 25 މިލިއަން ކޮންސޯލްތަކާ ގާތްކުރާ އަދަދަށް ވުރެ ކުޑަ އަދަދެކެވެ.
