ބަންގްލަދޭޝް އިން 2.2 ބިލިއަން ޑޮލަރުގެ ދިފާއީ އެއްބަސްވުމެއްގެ ދަށުން ޗައިނާއިން އުފައްދާފައިވާ ޖޭ-10ސީއީގެ 20 ފަޔަރ ޖެޓްގަތުމަށް ތައްޔާރުވަމުން އަންނަ ކަމަށް ރިޕޯޓްތަކުން ބުނެފިއެވެ. މި ފިޔަވަޅަކީ އެގައުމުގެ ވައިގެ ސިފައިން ޒަމާނީ ވަޞީލަތްތަކަށް ހާނުވާ، ހަލަބޮލި ސަރަހައްދެއްގައި ގައުމުގެ ސަލާމަތީ ކަންކަން ރަނގަޅު ކުރުމަށް ކުރަމުންދާ ފުޅާ މަސައްކަތުގެ ތެރެއިން ކުރިއަށް ގެންދާ ފިޔަވަޅެއް ކަމަށް ބަންގްލަދޭޝްއިން ބުނެއެވެ.
ބަންގްލަދޭޝްއިން ގަތުމަށް ތައްޔާރުވަމުންދާ ޖެޓްތަކަކީ ޕާކިސްތާނުންވެސް ބޭނުންކުރާ ބާވަތުގެ ފައިޓާ ޖެޓްތަކެވެ.
ރިޕޯޓްތަކުން ބުނާ ގޮތުގައި މި އެއްބަސްވުމުގެ ދަށުން ބަންގްލަދޭޝްއިން ގަންނަނީ ހަމައެކަނި ޖެޓްތަކެއް ނޫނެވެ. މި ޑީލްގައި ޕައިލެޓް ޓްރެއިނިން، ސްޕެއާ ޕާޓްސް، މެއިންޓެނަންސް، އަދި ސަޕޯޓް ސިސްޓަމްތައް ހިމެނޭއިރު، ގާތްގަނޑަކަށް 10 އަހަރަށް މި ޑީލްގެ ޕޭމަންޓްތައް ބަހާލައިފައިވެއެވެ.
ބަންގްލަދޭޝްގައި މިހާރު ބޭނުންކުރަނީ ދުވަސްވީ ގިނަ މަތިންދާބޯޓުތަކެވެ. ހާއްސަކޮށް ޗައިނާގެ އެފް-7 އާއި ރަޝިޔާގެ ބައެއް މިގް-29 އެވެ. މި ދުވަސްވީ ޖެޓްތައް ބެލެހެއްޓުމަށް ދަތިވަމުންދާ ކަމަށް ބަންގްލަދޭޝްއިން ފާހަގަކޮށްފައިވެއެވެ.
ޕާކިސްތާނުން މިހާރުވެސް ޖޭ-10ސީއީ / ޖޭ-10ސީ ޓައިޕްގެ ޖެޓްތައް ބޭނުންކުރާއިރު ބަންގްލަދޭޝްގެ މި ޑީލްގެ ސަބަބުން ބަންގްލަދޭޝް ވައިގެ ބާރުގެ ގޮތުން ޕާކިސްތާނުގެ ފެންވަރާ ގާތަށް ގެންދާނެ ކަމަށް ގިނަ ފަރާތްތަކުން ލަފާކުރާއިރު ޕާކިސްތާނުން ޗައިނާއާއި ސައުދީއާއި އަސްކަރީ ގޮތުންނާއި ޚާރިޖީ ގޮތުން ގުޅުން ވަރުގަދަ ކޮށްފައިވާ ދަނޑިވަޅެއްގައި ބަންގްލަދޭޝްއިން މިފަދަ ނިންމުމެއް ނިންމުމުގެ ސަބަބުން އިންޑިއާއިން އިތުރަށް ކަންބޮޑުވާނެކަމަށްވެސް ބެލެވެއެވެ.
