ބުރާސްފަތި ދުވަހު ޣައްޒާގެ ޣައްޒާ ސިޓީގައި އެހީގެ ކޮންވޯއީއަކުން ކާބޯތަކެތި ހޯދަން ޖަމާވެފަ ތިބި ފަލަސްތީނުގެ ގިނަ ބަޔަކަށް އިސްރާއީލު ސިފައިން ބަޑިޖަހާ ގިނަ ބަޔަކު ޝަހީދުކޮށްލައިފިއެވެ. ޣައްޒާގެ ހެލްތު މިނިސްޓްރީން ހާމަ ކުރި ގޮތުގައި 100 އަށް ވުރެ ގިނަ މީހުން މި ހަމަލާގައި ޝަހީދުވެފައިވެއެވެ. އިސްރާއީލާއި ހަމާސްގެ ހަނގުރާމަ ފެށުނު ފަހުން މަރުވި މީހުންގެ އަދަދު 30،000 އަށް ވުރެ މައްޗަށް އަރާފައިވާ ކަމަށް ސިއްހީ އޮފިޝަލުން ބުނެ އެވެ.

އިސްރާއީލު ސިފައިން ބަޑިޖަހާފައިވާކަން އިސްރާއީލުގެ އޮފިޝަލުންވެސް އޭއެފްޕީއަށް ކަށަވަރުކޮށްފައިވެއެވެ.

އޮކްޓޯބަރު ހަތް ވަނަ ދުވަހު ހަމާސްއިން ދިން ހަމަލާގެ ރައްދުގައި އިސްރާއީލުން ފެށި ވަޔާ، ކަނޑާއި ބިމުގެ ހަމަލާގެ ފުރަތަމަ އަމާޒަކީ ޣައްޒާ ސިޓީ އާއި އުތުރުގެ ވަށައިގެންވާ ސަރަހައްދުތަކެވެ.

ކާބޯތަކެތީގެ ބާވަތްތައް ހިފައިގެން ޓްރަކްތައް މި ހަފުތާގައި ޣައްޒާގެ އުތުރުގެ ސަރަހައްދަށް ގޮސްފައިވާއިރު، މިއީ މަހެއްހާ ދުވަހުގެ ތެރޭގައި އެ ސަރަހައްދަށް ފުރަތަމަ ފަހަރަށް އެހީތެރިކަން ފޯރުކޮށްދިން ފަހަރެވެ.

ޝިފާ ހޮސްޕިޓަލުގައި ފަރުވާ ދެމުން ދިޔަ ކަމާލް އަބޫ ނަހީލް ބުނީ އޭނާ އާއި އެހެން މީހުން ޑިސްޓްރިބިއުޝަން ޕޮއިންޓަށް ދިޔައީ ރޭގަނޑު ދަންވަރު ކާބޯތަކެތި ބަހާނެ ކަމަށް އަޑު އިވުމުން ކަމަށެވެ. "އަހަރެމެން ޖަނަވާރުގެ ކާނާ ކާތާ ދެ މަސް ވެއްޖެ،" އޭނާ ބުންޏެވެ.

އޭނާ ބުނިގޮތުގައި އިސްރާއީލު ސިފައިން އެއްވެ ތިބި މީހުން ގަޔަށް ބަޑިޖެހުމުން މީހުން އެކި ދިމަދިމާއަށް ފިލަން ދުވި ކަމަށެވެ. އަދި ބަޑިޖެހުން ހުއްޓުމުން މީހުން އެނބުރި ޓްރަކްތަކުގެ ކައިރިއަށް ދިޔުމުން، ސިފައިން އަނެއްކާވެސް ބަޑިޖަހާފައިވާ ކަމަށެވެ.