އެމެރިކާއިން ޣައްޒާއަށް ފޮނުވި އިންސާނީ އެހީގެ ފުރަތަމަ އެއާޑްރޮޕްގައި 30،000 އަށް ވުރެ ގިނަ ޕާރުސަލް މީލް ވައިކުޑައިން ތިން އަސްކަރީ މަތިންދާބޯޓުގައި ވައްޓާލައިފިއެވެ.

އުރުދުންގެ ވައިގެ ސިފައިންނާ ގުޅިގެން ހިންގި މި އޮޕަރޭޝަނަކީ ރައީސް ޖޯ ބައިޑަން އިއުލާން ކުރެއްވި އެހީގެ އޮޕަރޭޝަންތަކުގެ ތެރެއިން ފުރަތަމަ އޮޕަރޭޝަނެވެ.

އޭނާ ވަނީ ބުރާސްފަތި ދުވަހު ކޮންވޯއީއަކަށް އެއްވެ ތިބި ފަލަސްތީނު ރައްޔިތުން ގަޔަށް އިސްރާއީލުގެ ހައްދުފަހަނައެޅި ސިފައިން ހަމަލާދީ 112 މީހުން ޝަހީދުކޮށްލި ހާދިސާއަށް ފަހު އެހީ އިތުރު ކުރާނެ ކަމަށް ބުނެފައެވެ.

އެއާޑްރޮޕްކޮށްފައި ވަނީ ޣައްޒާގައި ހަ ހަފްތާގެ ހަނގުރާމަ ހުއްޓާލުމުގެ އެއްބަސްވުމުގެ އޮނިގަނޑު އެކުލަވާލާފައިވާ ދަނޑިވަޅެއްގަ އެވެ.

ހޮނިހިރު ދުވަހު ސީ-130 ޓްރާންސްޕޯޓް ބޯޓުތަކުން އެ ސަރަހައްދުގެ އައްސޭރިފަށަށް 38،000 އަށް ވުރެ ގިނަ މީލް ޕެކް ވައްޓާލި ކަމަށް އެމެރިކާގެ ސެންޓްރަލް ކޮމާންޑުން ނެރުނު ބަޔާނެއްގައި ބުނެފައިވެ އެވެ.

"މި އެއާޑްރޮޕްތަކަކީ ޣައްޒާއަށް އިތުރު އެހީ ހޯދުމަށް ކުރާ ދެމެހެއްޓެނިވި މަސައްކަތުގެ ބައެއް، އޭގެ ތެރޭގައި ބިމުގެ ކޯރިޑޯތަކާއި މަގުތަކުން އެހީގެ ދަތުރު ފުޅާކުރުން ހިމެނޭ،" އެ ބަޔާނުގައި އިތުރަށް ބުނެފައިވެ އެވެ.

އިނގިރޭސިވިލާތް، ފްރާންސް، މިސްރު އަދި އުރުދުން ފަދަ އެހެން ގައުމުތަކުން މީގެކުރިން ޣައްޒާއަށް ވައިގެ މަގުން އެހީ ވައްދާފައިވީނަމަވެސް މިއީ އެމެރިކާއިން ފުރަތަމަ ފަހަރަށް ދިން އެހީއެވެ.

އެމެރިކާ ސަރުކާރުގެ އޮފިޝަލުން ވިދާޅުވީ ބުރާސްފަތި ދުވަހުގެ "ހިތާމަވެރި ހާދިސާ" އިން "ޣައްޒާއަށް އިންސާނީ އެހީތެރިކަން ފޯރުކޮށްދިނުން ފުޅާކޮށް ދެމެހެއްޓުމުގެ މުހިންމުކަން" ފާހަގަކޮށްފައިވާ ކަމަށެވެ.

އެއާޑްރޮޕްތަކަކީ އެހީ ފޯރުކޮށްދިނުމަށް ނާކާމިޔާބު ގޮތެއް ކަމަށް އެހީދޭ އިދާރާތަކުން ބުނެފި އެވެ.