އިންޑިއާގެ މަހާރާޝްތުރާގެ ކަލްޔަންގެ އައިޑިއަލް ކޮލެޖުގެ މުސްލިމް ތިން ދަރިވަރަކަށް ކެމްޕަހުގައި ނަމާދު ކޮށްފައިވާތީ ވީއެޗްޕީ އާއި ބަޖްރަންގް ޑާލްގެ ގްރޫޕެއްގެ މެމްބަރުން އެމީހުންނަށް އަނިޔާކޮށް މައާފަށް އެދެން މަޖުބޫރުކޮށްފިއެވެ.

މި ހާދިސާގެ ވީޑިއޯއެއް ސޯޝަލް މީޑިއާގައި ވައިރަލްވެފައިވާއިރު ވީޑިއޯއިން ފެންނަ ގޮތުގައި އެ ދަރިވަރުންނަށް މައާފަށް އެދެން މަޖުބޫރުވެ، ހިންދޫ ދީނުގެ ކަލާނގެއެއް ކަމުގަިއވާ ޝިވާޖީގެ (ބުދު) ކުރިމަތީގައި ކަކޫ މައްޗަށް ތިރިކޮށްފައިވެއެވެ.

މި ހާދިސާ ހިނގިއިރު ފުލުހުންގެ އޮފިސަރުންވެސް އެވަގުތު އެތަނުގައި ތިބި އިރުވެސް ހާދިސާ ހުއްޓުވަން އެއްވެސް މަސައްކަތެއް ކުރިތަނެއް ވީޑިއޯއިން ފެނިފައިނުވެއެވެ.

މި ދަރިވަރުންތައް ވަނީ ލިބުނު އަނިޔާތަކުގެ ސަބަބުންނާއި މަޖުބޫރުން މައާފަށް އެދެން ޖެއްސުމުން ނަފްސާނީ ގޮތުން ވަރަށް ބޮޑަށް އަސަރުކޮށްފައިވާ ކަމަށް ރިޕޯޓްކޮށްފައިވެއެވެ. މީގެ އިތުރުން މި މައްސަލައާއި ގުޅިގެން މުސްލިމް ޖަމާއަތްތަކުން އަންނަނީ ހިތްހަމަނުޖެހުން ފާޅުކޮށް، އިންސާފުވެރި ތަހުގީގެއް ހިންގުމަށް އެދި ކޮލެޖަށް ގޮވާލަމުންނެވެ.

މި މައްސަލައާއި ގުޅިގެން އެއްވެސް މީހަކު ހައްޔަރުކޮށްފައިވާކަން ކަމާބެހޭ ފަރާތްތަކުން އަދި ކަށަވަރުކޮށްދީފައި ނުވި ނަމަވެސް މި މައްސަލަ ސޯޝަލް މީޑިއާގައި ފެތުރިފައިވާއިރު ހުރިހާ ދީނެއްގެ ދަރިވަރުންނަށް ކޮލެޖްތަކާއި ސްކޫލްތަކުގައި ރައްކާތެރިކަން ލިބިދޭންޖެހޭނެ ކަމަށް ގިނަ މީހުން ބުނެފައިވެއެވެ.