އިންޑިއާގެ ތެޔޮ ސާފުކުރާ ކުންފުނިތަކުން އަލުން އީރާނުން ތެޔޮ އެތެރެކުރުމުގެ މަސައްކަތް ފެށުމަށް ތައްޔާރުވަމުންދާ ކަމަށް ރޮއިޓާސް އިން ރިޕޯޓްކޮށްފިއެވެ.
މި ނިންމުމަކީ ދުނިޔޭގެ ބާޒާރުގައި ހަކަތައިގެ އަގު އުފުލެމުންދާތީ، އިންޑިއާއަށް ބޭނުންވާ ހަކަތަ ފޯރުކޮށްދިނުމުގައި ހުރި ދަތިތައް ކުޑަކުރުމަށް އެޅުނު މުހިންމު ފިޔަވަޅެކެވެ. އެމެރިކާއިން ދަތިކުރުމުގެ ފިޔަވަޅުތައް ވަގުތީ ގޮތުން އުވާލުމަކީ އިންޑިއާ ފަދަ ތެލަށް ބަރޯސާވާ ގައުމުތަކަށް ލިބުނު ބޮޑު ހިތްހަމަޖެހުމެކެވެ.
އިންޑިއާއަކީ ދުނިޔޭގައި ތިންވަނައަށް އެންމެ ގިނައިން ތެޔޮ ބޭނުންކުރާ ގައުމަށްވާއިރު، އީރާނަކީ ކުރިން އިންޑިއާއަށް އެންމެ ގިނައިން ތެޔޮ ފޯރުކޮށްދިން އެއް ގައުމެވެ. ނަމަވެސް އެމެރިކާއަށް ބިރުން ފާއިތުވި އަހަރުތަކުގައި އިންޑިއާއިން ވަނީ އީރާނުން ތެޔޮ ގަތުން މެދުކަނޑާލާފައެވެ.
ޚަބަރުތައް ބުނާގޮތުން، އިންޑިއާގެ ދައުލަތުގެ ތެޔޮ ކުންފުނިތަކުން މިހާރު ދަނީ އީރާނާއެކު ވިޔަފާރީގެ މުއާމަލާތްތައް އަލުން ފެށުމަށްޓަކައި ވާންޖެހޭ ތައްޔާރީތައް ވަމުންނެވެ. މީގެ ތެރޭގައި ތެޔޮ އުފުލުމަށް ބޭނުންވާ އިންޝުއަރެންސާއި ބޭންކިންގް މުއާމަލާތްތައް ހަމަޖެއްސުން ހިމެނެއެވެ. މި ފުރުސަތުގެ ބޭނުން ހިފައިގެން، އިންޑިއާއިން އުންމީދު ކުރަނީ ހެޔޮ އަގުގައި ތެޔޮ ހޯދައި، ގައުމުގެ ހަކަތައިގެ ރައްކާތެރިކަން ކަށަވަރު ކުރުމަށެވެ.
އިންޑިއާއިން ވަނީ އެ ގައުމުގެ ޓޭންކަރުތައް ހޮރްމުޒް ކަނޑުއޮޅި ހުރަސްކުރުމަށް އެމެރިކާގެ ޑޮލަރުގެ ބަދަލުގައި ޗައިނީޒް ޔުއާނުން ތެލަށް ފައިސާ އިރާނަށް ދައްކާފައެވެ.
