ޖަރުމަނުގެ ވައިގެ ސިފައިންގެ އިސް އޮފިޝަލުންތަކެއް ޔޫކްރޭނަށް ދުރު ރާސްތާގެ މިސައިލް ދިނުމާ ބެހޭ ގޮތުން މަޝްވަރާ ކުރާ އޯޑިއޯއެއް ރަޝިޔާއިން ލީކު ކޮށްލުމުން މަޝްރަހު އިތުރަށް ހޫނުވެ، ޖަރުމަނަށް ޖަވާބުދާރީ ވާން އުނދަގޫ ވެއްޖެ އެވެ.

މި އޯޑިއޯގައި ޔޫކްރޭންގެ ބިންމަތީގައި އިނގިރޭސިން ހިންގާ ކަމަށް ބުނާ އޮޕަރޭޝަންތަކުގެ ތަފްސީލު ވެސް ފާހަގަކޮށްފައިވެ އެވެ.

ރަޝިޔާގެ ދައުލަތުގެ އާރްޓީ ޗެނަލުން ވަނީ މިދިޔަ ހަފްތާގައި ބޭއްވި ބައްދަލުވުމުގެ އޯޑިއޯ ރެކޯޑިންއެއް އާންމުކޮށްފައެވެ.

މި އޯޑިއޯ ލީކުވުމުން ފްރާންސާއި އިނގިރޭސިވިލާތް ހިމެނޭ ގޮތަށް އެކުވެރި ގައުމުތަކުގެ މެދުގައި ޖަރުމަނުގެ ސަލާމަތާ މެދު ބޮޑެތި ކަންބޮޑުވުންތަކެއް ވަނީ އުފެދިފަ އެވެ.

ޖަރުމަނުގެ ޑިފެންސް މިނިސްޓްރީން ވަނީ ވައިގެ ސިފައިންގެ އޮފިޝަލުންގެ ދެއްކި ވާހަކަ "ރެކޯޑްކުރި"ކަން ކަށަވަރުކޮށްދީފައި - ނަމަވެސް ރެކޯޑިން އެއްވެސް ގޮތަކަށް ބަދަލުކޮށްފައިވާ ކަން ބުނަން ނޭނގޭ ކަމަށް ބުނެފައެވެ.

ޖަރުމަނުގެ ޗާންސެލާ އޮލަފް ޝޮލްޒް ވަނީ ޓޯރަސް މިސައިލްތައް ޔޫކްރޭނަށް ފޮނުވުމަށް ތަކުރާރުކޮށް ދެކޮޅު ހައްދަވާފައެވެ.

އެހެންނަމަވެސް ރެކޯޑިންގައި އެއާފޯސްގެ ވެރިޔާ އިންގޯ ގެރްހާޓްޒް އާއި ބްރިގޭޑިއާ ޖެނެރަލް ފްރެންކް ގްރެފޭ ހިމެނޭ ގޮތަށް ޖަރުމަނުގެ އިސް ހަތަރު އޮފިސަރުން ޔޫކްރޭނަށް ދުރު ރާސްތާގެ ކްރޫޒް މިސައިލް ފޯރުކޮށްދިނުމުގެ ފުރުސަތު އޮތް ގޮތާ ބެހޭ ގޮތުން މަޝްވަރާކޮށް، އެ ހަތިޔާރު ބޭނުންކޮށްގެން ކާރޗް ބްރިޖަށް ހަމަލާ ދެވިދާނެ ކަމަށް ބުނާ އަޑު އިވެއެވެ. މިއީ ކްރައިމިއާ ޕެނިންސުލާއާ ރަޝިޔާ ގުޅުވައިދޭ ބްރިޖެވެ.

އަދި ޓޯރަސް ނިޒާމު "މަސައްކަތް ވެސް ނުކުރާ" ކަމަށް ބުނާ އަޑުތައް ވެސް މިސްޓަރ ގެރހަރޓްޒް ފާހަގަކުރައްވައެވެ.

އަދި ޖަރުމަނުގެ ޑިފެންސް މިނިސްޓަރު ބޮރިސް ޕިސްޓޯރިއަސް ވަނީ ޖަރުމަނުން ޔޫކްރޭނަށް ޓޯރަސް ފޯރުކޮށްދޭން ނިންމައިފި ނަމަ އެކަމުގެ ނަތީޖާއާ މެދު ވިސްނާ ކަމަށެވެ.

އަދި ޔޫކްރޭންގެ ބިމުގައި އިނގިރޭސިން ހިންގާ ކަމަށް ތުހުމަތު ކުރެވޭ އޮޕަރޭޝަންތަކުގެ ތަފްސީލުތަކާ ބެހޭ ގޮތުން މަޝްވަރާކޮށް، ސްޓޯމް ޝެޑޯ މިސައިލްތައް މަސައްކަތް ކުރުމަށް ޔޫކްރޭން ސިފައިންނަށް އެހީތެރިވުމަށް އިނގިރޭސިވިލާތުން މުވައްޒަފުން ފޮނުވަމުންދާ ކަމަށް ވެސް މި އޯޑިއޯގައި ހިމެނެއެވެ.

އޮފިސަރުން ބުނާ ގޮތުގައި ޓޯރަސް ނިޒާމުގެ ކޮމްޕްލެކްސިޓީގެ ސަބަބުން ޔޫކްރޭނަށް ވެސް ޖަރުމަނުގެ މުވައްޒަފުންގެ ފަރާތުން މިފަދަ އެހީތެރިކަމާއި ތަމްރީނު ބޭނުންވާނެ އެވެ.

ހޯމަ ދުވަހު ޗާންސެލަރު އޮލަފް ޝޮލްޒް ވިދާޅުވީ ޔޫކްރޭންގެ ބިމުގައި ޖަރުމަނު ސިފައިން އެފަދަ މަސައްކަތެއްގައި ބައިވެރިވުމަކީ ވާނެ ކަމެއް ނޫން ކަމަށެވެ.

ކާރޗް ބްރިޖަށް ހަމަލާދޭން ދިމާވާ ލޮޖިސްޓިކަލް މައްސަލަތަކާ ބެހޭ ގޮތުން އޮފިޝަލުން މަޝްވަރާކޮށް، ޔޫކްރޭނަށް މިޝަން ޕްލޭނިންގެ އެހީތެރިކަން ބޭނުންވާނެ ކަމަށްވެސް ބުނެފައިވެއެވެ.

ލީކުވި ވާހަކައިގެ އަނެއް ބައިގައި އޮފިޝަލުން ބުނަނީ ޓޯރަސް އިން ހަނގުރާމައިގެ ދަތުރު ބަދަލު ނުކުރާނެ ކަމަށާއި ޖަރުމަނުން 100 އަށް ވުރެ ގިނަ މިސައިލް ޔޫކްރޭނަށް ނުފޮނުވާނެ ކަމަށެވެ.

އިނގިރޭސިވިލާތުގެ ޕާލަމެންޓްގެ މެމްބަރެއް އަދި ކޮމަންސް ޑިފެންސް ކޮމިޓީގެ ކުރީގެ ޗެއާމަން ޓޮބިއަސް އެލްވުޑް ބީބީސީއަށް ވިދާޅުވީ މި އޯޑިއޯ ލީކުވުމަކީ "ވަރަށް ބޮޑަށް ކަންބޮޑުވާ ކަމެއް" ކަމަށެވެ.

ރިޕޯޓްތައް ބުނާ ގޮތުގައި މި މަޝްވަރާ ކުރިއަށް ގެންދިޔައީ ރައްކާތެރި ސިފައިންގެ ޕްލެޓްފޯމަކަށް ވުރެ ވެބެކްސް ކޮންފަރެންސް ޕްލެޓްފޯމްގައި ކަމުން ބާލިންއަށް އިތުރު ލަދުވެތިކަމެއް ލިބުނު ކަމަށެވެ.

ޖަރުމަނުގެ މިލިޓަރީ ކައުންޓައިންޓެލިޖެންސް ސާވިސް އިން ދަނީ ސަލާމަތީ ގޮތުން ހިލާފުވި މައްސަލަ ތަހުގީގު ކުރަމުންނެވެ. އެކަމަކު ތަހުގީގުގެ ނަތީޖާ އާންމު ކުރާނެ ކަމެއް އަދި ސާފެއް ނުވެ އެވެ.