އޮސްޓްރޭލިއާގެ ސިޑްނީގައި ބޭއްވުނު ޔަހޫދީންގެ ބޮޑު ފެސްޓިވަލަކަށް އަމާޒުކޮށް ދިން ބަޑީގެ ހަމަލާއެއްގައި 16 މީހުން މަރުވެ، ގިނަ ބަޔަކަށް ވަނީ އަނިޔާވެފައެވެ. މި ހިތާމަވެރި ހާދިސާ ހިނގާފައިވަނީ ޑިސެމްބަރު 14 ވަނަ ދުވަހުގައެވެ.

މި ފެސްޓިވަލް ކުރިއަށް ދިޔަ ސަރަހައްދަށް ވަދެ، ހަމަލާދިން މީހާ ވަނީ ފެސްޓިވަލުގައި ބައިވެރިވެގެން ތިބި މީހުންނަށް އަމާޒުކޮށް ބަޑި ޖަހަން ފަށާފައެވެ. މި ހަމަލާގައި 16 މީހުން މަރުވުމުގެ އިތުރުން، އެތައް ބަޔަކު ޒަޚަމްވެ، އޭގެ ތެރެއިން ބައެއް މީހުންގެ ހާލު ސީރިއަސްކަމަށް ހޮސްޕިޓަލުން ވަނީ ހާމަކޮށްފައެވެ.

މި ހަމަލާގެ ވަގުތުގައި ހަމަލާދިން މީހާގެ އަތުން ބަޑި އަތުލައި، އޭނާ ހުއްޓުވީ އެ ސަރަހައްދުގައި ހުރި މުސްލިމް ރައްޔިތެއް ކަމަށް މީޑިއާ ރިޕޯޓުތައް ބުނެއެވެ. އެ މުސްލިމް މީހާގެ ހިތްވަރާއި ސާބިތުކަމުގެ ސަބަބުން، ހަމަލާގެ ސީރިއަސްކަން އިތުރުވިޔަ ނުދީ، އިތުރު ބަޔަކު މަރުވުމުން ސަލާމަތްވެފައިވާ ކަމަށް ބެލެވެއެވެ.

މި ހާދިސާ ހިނގިއިރު ފުލުހުންގެ އެހީތެރިކަން ލިބުން ލަސްވިކަމުގެ ކަންބޮޑުވުންތައް ވަނީ ފާޅުވެފައެވެ. ހަމަލާ ފެށުނުތާ ގާތްގަނޑަކަށް 20 މިނިޓް ފަހުން ފުލުހުން އެ ސަރަހައްދަށް އައިސްފައިވާ ކަމަށް އެތަނުގައި ތިބި މީހުން ބުނެފައިވާ ކަމަށް ރިޕޯޓްތަކުން ބުނެއެވެ. މިކަމާ ގުޅިގެން ސިޑްނީގެ ފުލުހުންގެ އިސް ބޭފުޅުން ވަނީ ހާދިސާ ހިނގި ގޮތް ތަހުގީގު ކުރަމުންދާ ކަމަށް ބުނެފައެވެ.

ހަމަލާ ދިން މީހާގެ މަގްސަދާއި މިކަމުގެ ފަހަތުގައިވާ ސަބަބުތައް އަދި ސާފެއް ނުވެއެވެ. ފުލުހުން މިހާރު ވަނީ މި ހާދިސާގެ ތަހުގީގު ފަށާފައިވާ ކަމަށާއި، ހަމަލާ ދިން މީހާއާ ގުޅުންހުރި މައުލޫމާތުތައް ހޯދުމުގެ މަސައްކަތް ކުރަމުންދާ ކަމަށް ބުނެފައެވެ. މި ހަމަލާއަކީ އޮސްޓްރޭލިއާގައި ހިނގާދިޔަ އެންމެ ނުރައްކާތެރި ހަމަލާތަކުގެ ތެރޭގައި ގުނާލެވޭނެ ހަމަލާއެކެވެ.