ޔޫކްރޭން ސިފައިން ރަޝިޔާގެ ބާރުގެ ދަށުގައިވާ ކަޅު ކަނޑުގެ ސަރަހައްދުގައ ހަރަކާތްތެރިވަމުން ދިޔަ އަސްކަރީ ބޯޓެއް ހައިޓެކް ކަނޑުގެ ޑްރޯންތައް ބޭނުންކޮށްގެން ހަމަލާދީ ފައްތާލާފައިވާ ކަމަށް ޔޫކްރޭނުން އަންގާރަ ދުވަހު ބުނެފި އެވެ.  ރަޝިޔާގެ ކަމާބެހޭ ފަރާތްތަކުން އެކަން ކަށަވަރުކޮށްދީފައެއް ނުވެއެވެ.

ޔޫކްރޭންގެ އަސްކަރީ ޖާސޫސީ އިދާރާއިން ބުނީ ސްޕެޝަލް އޮޕަރޭޝަންސް ޔުނިޓަކުން ބޮޑު ޕެޓްރޯލް ޝިޕް ސަރގޭ ކޮޓޯވް ރޭގަނޑުގެ ވަގުތެއްގައި ނައްތާލާފައިވާ ކަމަށެވެ.  ޔޫކްރޭނުން ބުނި  ގޮތުގައި މިއީ 2021 ވަނަ އަހަރު ކޮމިޝަންކޮށްފައިވާ ބޯޓެކެވެ. މި ބޯޓް ދަތުރު ކުރަމުން ދިޔައީ ކެރްޗް ސްޓްރޭޓް ކައިރިން ކަމަށާ މި ބޯޓުގައި ކްރޫޒް މިސައިލްތަކާއި ގާތްގަނޑަކަށް 60 ފަޅުވެރިން އުފުލޭނެ ކަމަށް ރިޕޯޓްތައް ބުނެ އެވެ.

މިފަދަ ޒަމާނީ ބޯޓެއް އަޑިއަށް ދިއުމަކީ މޮސްކޯގެ ކަޅު ކަނޑުގެ ފްލީޓުގައި އިތުރު އުޅަނދު ހުރި ނަމަވެސް، މޮސްކޯއަށް ލިބޭނެ ބޮޑު ގެއްލުމަކާއި ލަދުވެތި ކަމެކެވެ.

ކިއެވްގެ އޮފިޝަލުން ބުނާ ގޮތުގައި ރަޝިޔާއިން ޔޫކްރޭނަށް ދޭ މިސައިލް ހަމަލާތަކުގެ %20 އަކީ ކަޅު ކަނޑުން ފޮނުވާ ހަމަލާތަކެއް ކަމަށާއި، ޔޫކްރޭންގެ ކާމިޔާބު ހަމަލާތަކުގެ ސަބަބުން މޮސްކޯގެ ގާބިލްކަން ގެއްލިފައިވާ ކަމަށެވެ.

އެމެރިކާގެ ތިންކް ޓޭންކެއް ކަމަށްވާ ފޮރިން ޕޮލިސީ ރިސާޗް އިންސްޓިޓިއުޓުން މިދިޔަ މަހު ޝާއިއުކުރި ލިޔުމެއްގައި ބުނެފައި ވަނީ ސާގޭ ކޮޓޯވް ފަދަ ޕެޓްރޯލް ބޯޓުތަކަކީ ޑްރޯން ހަމަލާތަކާ ދެކޮޅަށް ރަޝިޔާއިން އަޅާ ފިޔަވަޅުތަކުގެ ބައެއް ކަމަށެވެ.  އެ އުޅަނދުތަކުގައި ރާޑަރާއި ހެލިކޮޕްޓަރު ބޭނުންކޮށްގެން ގްރެނޭޑް ލޯންޗަރާއި ބޮޑެތި މެޝިންގަންތަކާއި ޑްރޯންތައް ހޯދައި ނައްތާލުމުގެ ގާބިލުކަން ހުރިކަމަށްވެސް ކަމަށް ވެސް ބުނެފައިވެ އެވެ.

ކަޅު ކަނޑުގައި ދުޝްމަނުންގެ ހަނގުރާމަ މަނަވަރުތަކާ ދެކޮޅަށް ޔޫކްރޭނުން ހޯދި ކާމިޔާބީތަކުގެ ސަބަބުން ރަޝިޔާގެ ފްލީޓް އައްސޭރިފަށާ ދުރަށް ޖެހި، ޔޫކްރޭނަށް ދަނޑުވެރިކަން އެކްސްޕޯޓް ކުރުމުގެ ކޯރިޑޯއެއް ގާއިމް ކުރުމުގެ ފުރުސަތު ވަނީ ލިބިފަ އެވެ.

ޔޫކްރޭންގެ ޑިފެންސް މިނިސްޓްރީން ޓްވިޓާ/އެކްސްގައި މިހަމަލާގެ ވީޑިއޯ އާންމުކޮށްފައިވެއެވެ. މި ވީޑިއޯ އިން ފެންނީ ޔޫކްރޭންގައި ޑިޒައިންކޮށް އުފައްދާ ގޮވާތަކެތި ބަރުކޮށްފައިވާ މަގޫރާ ވީ5 ފަޅުވެރިން ނެތް އުޅަނދުތައް ބޭނުންކޮށްގެން ރޭގަނޑު ސާގޭ ކޮޓޯވްއަށް ދިން ހަމަލާއެވެ.  ރަޝިޔާގެ ފަޅުވެރިންގެ ހަތް މީހަކު މަރުވެ ހަ މީހަކަށް އަނިޔާވެފައިވާއިރު، 52 މީހަކު ސަލާމަތްކޮށްފައިވާ ކަމަށް އަސްކަރީ ޖާސޫސީ އިދާރާއިން ބުނެފި އެވެ.

ޕްރައިވެޓް ސެކިއުރިޓީ ކުންފުނި އަމްބްރޭ ބުނީ ހަމަލާ ދީފައިވަނީ ކްރައިމިއާގެ ފިއޮޑޯސިއާ ބަނދަރަށް ކަމަށާއި އެ ބަނދަރުގައި ވިޔަފާރި އުޅަނދެއްގެ ފަޅުވެރިއަކު ނަގާފައިވާ ފޫޓޭޖެއްގައި ރަޝިޔާގެ އަސްކަރީ ބޯޓު ޔޫކްރޭންގެ ޑްރޯން ބޯޓުތަކަށް ހަމަލާދޭތަން ފެންނަ ކަމަށެވެ.

ބޯޓުގައި މަދުވެގެން ދެ ހަމަލާ ޖެހިފައިވާއިރު، ދެވަނަ ހަމަލާގެ ސަބަބުން ބޮޑު ގޮވުމެއް ގޮއްވާލާފައިވާ ކަމަށް އެމްބްރޭ ރިޕޯޓްކޮށްފައިވެއެވެ.

މިދިޔަ މަހު ޔޫކްރޭނުން ވަނީ ޑްރޯން ބޭނުންކޮށްގެން ރަޝިޔާގެ ހަނގުރާމަ މަނަވަރުތައް ދެ ފަހަރެއްގެ މަތިން އަޑިއަށް ފައްތާލާފައެވެ.  ފެބްރުއަރީ 1 ވަނަ ދުވަހު ރަޝިޔާގެ މިސައިލް ހަތިޔާރު އެޅި ކޯވެޓް އިވަނޮވެޓްސް ފައްތާލި ކަމަށް ބުނެފައިވާއިރު، ފެބްރުއަރީ 14 ވަނަ ދުވަހު ސީޒަރ ކުނިކޯވް ލޭންޑިން ޝިޕް ފައްތާލާފައިވާ ކަމަށް ބުނެފައިވެ އެވެ.  އެ ވާހަކަތައް ރަޝިޔާގެ އޮފިޝަލުން ކަށަވަރުކޮށްދީފައެއް ނުވެއެވެ.