އީރާނުގެ ދާޚިލީ ކަންކަމުގެ ތެރެއަށް ބޭރުގެ ނުފޫޒު ފޯރުވުމަށް އެމެރިކާގެ ކުރީގެ ނޭޝަނަލް ސެކިއުރިޓީ އެޑްވައިޒަރު ޖޯން ބޯލްޓަން ގޮވާލެއްވުމާ ގުޅިގެން، އެކަމަކީ ބައިނަލްއަގުވާމީ މިންގަނޑުތަކާ ޚިލާފު ކަމެއްގެ ގޮތުގައި ގިނަ ބަޔަކު ސިފަކޮށްފިއެވެ.

މިދިޔަ ހަފުތާގައި ބޯލްޓަން ދެއްވި ބަސްދީގަތުމެއްގައި ވިދާޅުވީ، އީރާނުގެ މިހާރުގެ ސަރުކާރު ވައްޓާލުމަށްޓަކައި ހަމައެކަނި މުޒާހަރާތަކަކުން ނުފުދޭނެ ކަމަށެވެ. އޭނާގެ މަގުސަދަކީ އީރާނުގެ ވެރިކަން ބަދަލުކުރުން ކަމަށް ހާމަކުރައްވަމުން ބޯލްޓަން ވިދާޅުވީ، މިކަމަށްޓަކައި ދިގުމުއްދަތުގެ ނިޒާމީ ސްޓްރެޓެޖީއެއް އެކުލަވާލަންޖެހޭ ކަމަށެވެ.

ބޯލްޓަންގެ މި ވާހަކަތަކަކީ މިނިވަން ދައުލަތެއްގެ ސިޔާދަތަށް އަރައިގަތުމަށް ހިތްވަރުދޭ ވާހަކަތަކެއްގެ ގޮތުގައި ސިޔާސީ މުހައްލިލުން ދެކެއެވެ. އީރާނުން ތަކުރާރުކޮށް ބުނަމުންދަނީ ގައުމުގެ ދާޚިލީ ކަންކަން ނިންމާނީ އެ ގައުމުގެ ރައްޔިތުން ކަމަށާއި، ބޭރުގެ ބާރުތަކުން ގައުމުގެ ހަމަޖެހުން ނަގާލުމަށް ކުރާ މަސައްކަތްތައް ކާމިޔާބު ނުވާނެ ކަމަށެވެ.

އީރާނަކީ ސަރަހައްދީ ގޮތުންނާއި އިސްލާމީ އުންމަތުގައި މުހިންމު ދައުރެއް އަދާކުރާ ގައުމަކަށްވާއިރު، އެ ގައުމުގެ ދާޚިލީ މަސްލަހަތު ގެއްލޭ ފަދަ އަމަލުތަކަށް ހިތްވަރު ދިނުމަކީ މެދުއިރުމަތީގެ ސަލާމަތަށް އޮތް ނުރައްކަލެއް ކަމަށް ގިނަ ފަރާތްތަކުން ގަބޫލުކުރެއެވެ.

ބޯލްޓަން ފަދަ ހަރުކަށި ފިކުރުގެ ބޭފުޅުން މީގެ ކުރިންވެސް ވަނީ އެކި ގައުމުތަކުގެ ވެރިކަން ބަދަލުކުރުމަށް ބާރުއަޅުއްވައި، އެ ގައުމުތައް ބޮޑެތި ހަމަނުޖެހުންތަކެއްގެ ތެރެއަށް ވައްޓާލުމަށް މަސައްކަތް ކުރައްވާފައެވެ.