އަރަބި ކަނޑުގައި ހަރަކާތްތެރިވަމުންދާ އެމެރިކާގެ މަތިންދާބޯޓު އުފުލާ މަނަވަރު "ޔޫއެސްއެސް އަބްރަހަމް ލިންކަން" އާއި އެ ބޯޓުގެ ސްޓްރައިކް ގްރޫޕްގެ ހަރަކާތްތައް ބަލައި، އެ ތަކެތި ނައްތާލުމަށް ތައްޔާރުވުމުގެ ގޮތުން އީރާނުން ވަރުގަދަ އޮޕަރޭޝަނެއް ފަށައިފިއެވެ.

މި އޮޕަރޭޝަނުގެ ދަށުން، އީރާނުގެ އެންމެ ޒަމާނީ ޑްރޯންތައް ދަނީ އަރަބި ކަނޑުގެ ސަރަހައްދުގައި ފޯރިމަރަމުންނެވެ. މި ޑްރޯންތަކުގެ މައިގަނޑު ބޭނުމަކީ ޔޫއެސްއެސް ލިންކަން އާއި އޭގެ ކެރިއާ ސްޓްރައިކް ގްރޫޕްގެ ހަރަކާތްތައް ދެނެގަނެ، ބޯޓު އަޑިއަށް ގެންދިއުމަށް ބޭނުންވާ މުހިންމު މަޢުލޫމާތުތައް އެއްކުރުމެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ތަކުރާރުކޮށް އިންޒާރު ދެމުންދިޔަ ނަމަވެސް، އީރާނުން ވަނީ އެ އިންޒާރުތަކަށް ބެލުމެއްނެތި އެ ސަރަހައްދުގައި ކުރިއަށްގެންދާ ޑްރޯން ރިކޮނައިސަންސް ހަރަކާތްތައް އިތުރަށް ވަރުގަދަކޮށްފައެވެ. މަސްރަޙް ދިރާސާކުރާ ފަރާތްތަކުން ބުނާ ގޮތުގައި، މިއީ ކުރިން ދުވަހަކުވެސް އީރާނުން މި ފަދަ މަނަވަރުތަކަށް ފާރަވެރިނުވާ މިންވަރަށް ކުރިއަށްގެންދާ ވަރުގަދަ އަސްކަރީ ހަރަކާތެކެވެ.

މި ހަރަކާތްތަކުގެ ސަބަބުން އެމެރިކާގެ އަސްކަރިއްޔާއަށް ވަނީ ބޮޑު ނުތަނަވަސްކަމަކާ ކުރިމަތިލާން ޖެހިފައެވެ. އީރާނުގެ މި ދުރުރާސްތާ ޑްރޯންތަކަކީ އެމެރިކާގެ އެންމެ ޒަމާނީ ރޭޑާރުތަކަށްވެސް ފާހަގަކުރަން އުނދަގޫ، އަދި ވަރަށް ސައްހަ މަޢުލޫމާތު ފޯރުކޮށްދޭ އުދުހޭ އާލާތްތަކެކެވެ. މީގެ ސަބަބުން އަރަބި ކަނޑުގެ ސަރަހައްދުގައި އެމެރިކާގެ ބާރު ކުޑަވެ، އީރާނުގެ އަސްކަރީ ގާބިލުކަން މުޅި ސަރަހައްދަށް މިހާރު ދަނީ ދައްކާލަމުންނެވެ.